24-январдиз Дагъустандин Кьил Сергей Меликова ТОКС-дин (Республиканский телевизионный отряд краеведов-следопытов) векилрихъ галаз гуьруьш кьиле тухвана. “Лезги газетдиз” РД-дин Кьилин пресс-къуллугъди хабар гайивал, ана республикадин образованидин ва илимдин министрдин везифаяр вахтуналди тамамарзавай Я.Бучаева, жегьилрин крарин рекьяй министрдин везифаяр вахтуналди тамамарзавай К.Саидова, ТОКС-дин командир М.Нурасулмегьамедова ва масабуру иштиракна.
Сергей Меликова къейд авурвал, дяведин йисара гел галачиз квахьайбурукай делилар жагъур хъувунин карда отрядди чIехи кIвалах кьиле тухузва. Лагьана кIанда, и кIвалахдал гзаф кьадар жегьиларни желбзава.
“Аялриз тербия гунин рекьяй цIи республикада махсус программа кардик акатдайвал я. Кьилди къачуртIа, чаз военный, ватанпересвилин тербия вилик тухунин, чи адетар хуьнин карда куьмекдай тешкилатар арадал гъиз кIанзава. Мисал яз, Юнармиядин кIвал. Ам ТОКС-дин векилар галачиз фикирдиз гъиз жедач. ГьикI лагьайтIа, отряддин ва Юнармиядин кIвалах сад-садаз мукьва я…”, — къейдна С.Меликова.
Отрядди кьиле тухузвай кIвалахдикай гегьеншдиз ихтилатар авурдалай кьулухъ ТОКС-дин векилри хабар гайивал, цIи генерал-майор, Афгъандин дяведин иштиракчи Омар Муртазалиевакай документальный фильм гьазурдайвал я. Ада хейлин йисара отряддиз регьбервал ганай.
Къейд ийин хьи, Дагъустанда ТОКС 1970-йисуз арадал гъанай. Адан асас макьсад Ватандин ЧIехи дяведа гел галачиз квахьайбурукай делилар, малуматар жагъурун я. Алай вахтунда республикадин шегьеррани районра гел жагъурдайбурун 110 отряд кардик ква.
Чи мухбир
