И йикъара Дагъустан Республикадин Халкьдин Собранидин депутат,  Дагъус­тандин здравоохраненидин министерстводихъ галаз алакъалу Общественный советдин председатель Ильман Алипулатова Мегьарамдхуьруьн райондин агьалийриз дуьньяда, республикада агъавалзавай фендигар тIугъ­валдиз акси рапар ягъу­низ эвер гана. Эвер гун ада Инстаграм сетда вичин чина чапнава…

“Мегьарамдхуьруьн райондин гьуьрметлу агьа­лияр, играми ватандашар! Къенин юкъуз районда, республикада ва санлай вири уьлкведа арадал атанвай эпидемиологиядин чIуру гьаларихъ галаз алакъа­лу яз, за, квехъ гьар садахъ элкъвена, эвер гузва. Гьайиф хьи, вирида арадал атанвай гьалариз дуьз къимет гузвач, гьукумдин органри ва медицинадин къуллугъчийри кьабулзавай серенжемрин ва­жиблувал эхирдалди аннамишзавач.

Коронавирусди гьужумзава. Гьалар чIур­завайди мадни ам я хьи, тIугъвал дегиш, мад­ни активниди жезва. Ада гзаф кьадар мутацияр (жуьреяр) арадал гъизва, ам лап фад акатдайдаз, инсандин сагъламвилиз мадни чIурудаказ таъсирдайдаз элкъвезва. ЧIехи яшарин ва чпихъ яргъалди сагъариз тежезвай азарар авай инсанрин сагъламвал мадни хаталувилик акатзава. Райондин медицинадин вири идарайри алай вахтунда вири къуватар тIугъвалдихъ галаз женг чIу­гунин кардихъ элкъуьрнава. ЧIуг­вазвай зегь­метар бадгьавая финиз чна рехъ гана кIандач. Халкь сад хьун важиблу я. ИкI та­хьайтIа, азардихъ галаз женг чIугваз жедач!

Къенин юкъуз Мегьарамдхуьруьн районда коронавирусдиз акси рапар янавайбурун кьадар 40 процентдилай агъуз я, умуми иммунитет арадал гъун патал им якъин тIи­мил я. Инсанрин сагъламвал ва уьмуьр хуьн патал азардиз акси рапар ягъуник йигинвал хьана кIан­зава. Гьалар четинбур я, анжах чна, вирида саналди, сад хьана, лазим вири къайдайрал амал авуналди, и завалдикай чун хуьн, адакай азад авун герек я! Вири сад хьун, жавабдарвал, жув хуьн исятда виридалайни важиблу я. Куьне куьн ва амайбур хуьх!

Мегьарамдхуьруьн райондин гьуьрметлу агьалияр! Куьне жуван ва багърийрин сагъламвилин гьакъиндай жавабдарвал хивяй акъудмир! Арадал атанвай гьалара виридалайни менфятлу авай са рехъ коронавирусдиз акси раб ягъун я. Жув ва жуван багърияр фендигар азардикай хуьн патал и мумкинвиликай менфят къачу — раб ягъа! Зани азардиз акси раб яна, жув хъсан гьиссзава. ГьакIни зи багърийри, мукьва-кьилийри, кIвалах­дин рекьяй юлдашри, дустари менфятлу и рехъ хкянава. За квезни мес­лят­зава!

Райондин медицинадин идараяр лазим вири затIаралди таъмин я, анра лазим медикаментар ва дезинфекциядин такьатар ава. Райондин центральный больницада азарлуяр кьабулдай ва са­гъар­дай вири шартIар тешкилнава. Къенин юкъуз азар сагъардай менфятлу къайдаяр арадал гъанва, духтуррихъ ла­зим кьадар тежриба ава.

Анжах вирида къуватар сад авуналди чавай и завалдикай хуьз ва чаз адетдинди тир уьмуьрдал эхлячI хъийидай мумкинвал жеда.

За квехъ виридахъ мягькем сагъвал, сабурлувал ва азардиз акси рапар ягъунин карда активвал хьун алхишзава. Куьне куьн ва куь багърияр хуьх!”, — кхьенва Ильман Алипулатова.

Чи  мухбир