Квез чидани?
— Тунис Кеферпатан Африкадин виридалайни гъвечIи уьлкве я. Меркездин тIварни Тунис я.
— И уьлкведин кьиблепатан мулкар Сахара къумлухдик акатзава.
— Тунисда 11 миллиондилай гзаф инсанар яшамиш жезва.
— Тунисдин агьалийрин 97 процент арабар я. Государстводин кьилин чIални араб чIал я.
— Тунисдин мулкарин умуми майданди 163610 квадратный километр кьазва.
— Исламдин памятникрин арада, Меккадилай, Мединадилай ва Иерусалимдилай алатайла, Тунисдин Кайруан шегьерди кьуд лагьай чка кьазва.
— Бязи чешмейри тестикьарзавайвал, ирид сеферда пак Кайруан шегьердиз фейила, Меккадиз зияратдиз фейи гьисаб жезва.
— Персиядинбурулайни Китайдинбурулай алатайла, Кайруандин гамар къиметлувилин жигьетдай дуьньяда пуд лагьай чкадал ала.
— Гатун береда Тунисда кIвалахдин вахт сятдин 7-даз башламиш жезва, нисинин 2-даз акьалтIзава. Им дурум гуз тежедай хьтин зегьем хьунихъ галаз алакъалу я.
— Хаммамет шегьер Тунисда туриствилин еке курорт яз гьисабзава, 1960-йисалай аниз вири Европадай ял ягъун патал инсанар физва.
— Агьалийрин кьадардал гьалтайла, и уьлкве дуьньяда 82 лагьай чкадал ала, мулкарал гьалтайла — 91 лагьай чкадал.
— Эгер улакь гьалзавайди дишегьли ятIа, Тунисдин полициядин къуллугъчийриз рекьерин гьерекатрин къайдаяр чIурай дуьшуьшра машин акъвазардай ихтиярар авач.
— Уьлкведин агьалийрин арада виридалайни гзаф машгьур спортдин жуьре футбол я.
— Тунисдин мулкарал 2 агъзур йис кьван “яшар” хьанвай зейтундин тарар экъечIзава.
«Лезги газет»
