Дарманрин набататар
ВакIан канаб лугьудай и набататдиз урус чIалал са шумуд тIвар ава: хвощ, конский хвост, сосонка, толкачик. М.Бабаханован лезги чIаланни урус чIалан гафарганда къалурнавайвал, лезги чIалал “хвощдиз” “вакIан канаб” лугьузва.
Кьакьанвал 40-50 сантиметрдив агакьдай и хъач Россиядин саки вири чкайра гьалтзава. Асул гьисабдай тамара, кIачIичIлух чкайра, вацIарин къерехра жеда. ВакIан канаб чиляй четиндиз акъудиз жедай эчIелрикай яз гьисабзава. Винел патан акунрай ам муьтквер тарциз ухшар я.
ВакIан канабдик хийирлу такьатарни ква. Адан дувул тушир паюник глюкоза, арабиноза, ксилоза, галактоза, шкьакьар, каротин, С витамин, минеральный кьелер ва хейлин маса затIар ква. Емиш такьунвай бертер гатун вахтунда кIватIна кIанзава ва чардахрик кьурурзава. Кьурурайдалай кьулухъ абур парчадин ва я чарчин чантада (шешелда) хуьда. Вини кьил 4 йисуз хуьз жеда.
И набататдикай микробриз, шарариз, иви акъвазаруниз акси яз, тIуьрди хъсандиз иливарунин, беден мягькемарунин кардани, гьакIни антисептик яз хийир къачуз жезва.
Кьилди къачуртIа, нефес кьадай вахтундани, туьтер тIазвай-лани, грибокдин инфекциядиз, артроздиз, радикулитдиз, артритдиз, остеохондроздиз, хуквадин ва верем азарриз акси яз ишлемишзава. Азарар сагъарунин рекье асул гьисабдай вакIан канабдин гьалимадикайни настойдикай менфят къачузва.
Къейд ийин, 3 йисан яшдив агакь тавунвай аялриз талукь яз вакIан канаб ишлемишна виже къведач. КIвачел заланзавай дишегьлийрини, инсандин бедендин къенепатай гзаф иви авахьзавайлани и набатат ишлемишун къадагъа авунва.
РикIел хуьн важиблу я, дармандин такьатар гьазурунин ва абур ишлемишунин жигьетдай сифте нубатда духтурривай, пешекарривай меслятар къачун чарасуз я.
«Лезги газет»
