Суваррилай гуьгъуьнин юкъуз Мегьарамдхуьруьн районда яшамиш жезвай зегьметдин ва далу патан ветеран, 91 йисан яшда авай  Шагьмирзе  Мирземетова  коронавирусдиз акси раб яна. Идакай райондин пресс-къуллугъди хабар гузва. Алай вах­тунда чIуру азардикай хуьн патал им виридалайни менфятлу рехъ тирди фикирда кьуна, ветеранди вичин ва багърийрин уьмуьр ва сагъламвал хаталувиликай хкудунин къарар кьабулна…­

Шагьмирзе Рамазанович медицинадивай яргъа кас туш, гьикI хьи, 50 йисалай виниз ада здравоохраненидин хиле зегьмет чIугуна. Советрин девирда тиф, ярар, ваба ва ха­талу  ма­са азаррикайни анжах абуруз акси рапар ягъуналди абурун вилик пад кьаз алакьайди ветеранди рикIелай ракъур­завач.

— За жуван ватандашриз азардиз акси рапар ягъуниз, абурукай кичIе тахьуниз эвер гузва. Чалай анжах и тегьерда жуван ва багъ­рий­рин сагъламвал хуьз алакьда. Сагъламвал инсандиз виридалайни багьа я. ТIугъ­вал­дин гьа­лара кьилин месэлани, вири сад хьана, азардин хура акъвазна, адахъ галаз женг чIугун я, — къейдна ада.

Мегьарамдхуьруьн районда коронавирусдин тIугъвалдиз акси рапар ягъун давам жезва. ИкI, 8-январдин малуматралди, 11723 касди рапар янава. Райадминистрациядин пресс-къуллугъди мадни­ алава хъувурвал, вакцинация кьиле тухун патал гьар юкъуз духтур­рин мобильный бригадаяр райондин хуьрериз физва. Графикдикай лагьайтIа, райондин администрацияди хуьрерин кьилериз ва умуми образованидин идарайрин регьберриз виликамаз хабар гузва.

«Лезги газет»