ЦIийи ктаб

Алатай йисан эхирра Махач­къа­лада, “Мавел” чапханада, лезги чIалал “Мусурман хуьдай къеле” тIвар алаз диндин ктабдиз экв акуна. Ам чапдиз гьа­зурайди алим  Ямин  гьажи  ­Мегьамедов  я.

И ктабда Ислам диндин чIе­хи алимди гьазурнавай, Къу­ръ­андай ва гьадисрай къачунвай дуьайрикай ибарат тир “Мусурмандин къеле” тIвар алай кIва­тIал лезги чIалаз элкъуьрнава. Таржума авурбур Багьаудинан хва Рамазан Рустамов ва Ам­ра­гьан  хва  Ямин  Мегьаме­дов  я.

Ктабда дуьадихъ авай еке важиблувиликайни раханва. Таржумачийри къейдзавайвал, дуьадихъ еке лайихлувилер, метлеб ва таъсир ава. Аллагь-Таалади лугьузва (40-сура, 60-аят, мана): “Эвера Заз куьне (са Заз дуьа ая, ялвар ая) — За квез жаваб гуда…”.

Виридалайни хъсан ва менфятлу дуьаяр Аллагь-Тааладин Къуръанда ва Пайгъамбардин (къуй Аллагьдин патай салават ва саламар хьурай вичиз) гьадисра авайбур я. Ахьтин дуьайрикай инсандиз и дуьньядани менфят ава, Эхиратдани.

“Вич вири дуьньяда маш­гьур тир и гъвечIи ктабда инсандиз уьмуьрдин гьар са гьалда герек къведай дуьаяр кIватI­нава. Абур Къуръандай ва гьадисрай къачунва. Гьавиляй чна, Аллагьдин рекье, ам лезги чIалаз таржума авуна, гьазурнава. Чи халкьдиз адакай менфят хьун патал”, — кхьенва таржумачийри кIелзавайди ктабдихъ галаз танишарзавай гъвечIи макъалада.

Къейд ийин хьи, “Мусурман хуьдай къеле” ктаб “Лезги газетдин” редакциядай маса къачуз жеда. Къимет — 150 манат.

РикIел хкин, газетдин редакциядай Ямин гьажи Мегьамедован лезги чIалал чапнавай диндин мад са шумуд ктаб маса гузва. Абурун арада “Пак Къуръан ва адан манайрин таржума ­лезги чIалал” (1000 манат), “Мугьам­мад пайгъамбардин (къуй Аллагьдин патай салават ва саламар хьурай вичиз) уьмуьрдин рехъ” (500 манат), “Инсаниятдиз чешнелу ксар” (150 манат), “Исламдин эдебар, ахлакьар ва дуьаяр”, “Пайгъамбаррин варисар”, “Тажвид-илим” — лезги чIа­лал” (гьар сад — 100 манат) ава.

Агьмед Магьмудов