Лезги халкьдин тIвар адлу ийизвай рухваярни рушар чи чIехи Ватандин гзаф пипIе­риз акъатнава. Мукьвал-мукьвал анрай чав шад хабарарни агакьзава.

Ингье и йикъара Астрахань шегьердай чаз кхьенвайвал, чпин ери-бине Дагъустандай — Лезгистандай тир кьве духтурдив — алим­рив — медицинадин илимрин доктор, про­фессор Элдар  Аб­дурагьимович  Кчибе­говавни  (ам Докъузпара райондин Миграгъ-Къазмайрин хуьряй я)  Казим  Гьуьсейнович  Гьасановав  (ам Кьурагь райондин КьепIиррин хуьряй я) ЦIийи йисан вилик квай йи­къара (хирургиядин рекьяй) инсанрин сагъламвал мягькемардай операцияр авунин цIийи­ рекьер ва тадаракар арадал гъуниз талукь цIийи патентар (шагьадатнамаяр) вахкана.

Чарче къейднавайвал, илимрин доктор Элдар Абдурагьимовичакай (шикилда чапла патахъ гала) гила 35 патентдин, жегьил духтур-алим, Астрахандин медицинадин уни­верситетдин кафедрадин ассистент Казим Гьуьсейновичакай (шикилда эрчIи патахъ гала) 4 патентдин иесияр хьанва.

Им лагьай гаф я хьи, чи рухвайри ме­дицинадин илимда ва агьалияр сагъарунин рекье цIийи-цIийи дережаяр — аршар къа­чузва. Илим ва тежриба санал вилик тухузва!

Элдар Абдурагьимовичан гъиликай 200-далай виниз илимдин кIвалахар хкатнава. Адан тIвар медицинадин илимдал машгъул гзаф меркезра (Астраханда, Ростовда, Москвада, Махачкъалада, масанра) машгьур я. Адан гъилик чирвилер ва тежриба къачузвай Казим Гьуьсейновичани вичихъ кьетIен алакьунар, гегьенш рекьер ва мумкинвилер авайди субутзава.

Къуй чи рухвайрихъ мадни цIийи агалкьунар, мягькем сагъламвал хьурай. Ватанди, халкьди квел ва куьн хьтин маса кьегьалрал анжах дамахда!

Мерд Али