Чи ватанэгьлияр — гьар сана

Арада еке мензил авазни рафтарвилер ийидай, дуствал мягькемардай, чирхчирар жагъурдай ва цIийи танишвилер арадал гъидай мумкинвилер авай интернетдин де­вирда гъвечIи халкьарин векилрини чеб кьулухъ галамайбур яз къалурзавач. Гьа жергедай яз — лезгийрини. Къе неинки Россиядин жуьреба-жуьре шегьерра, гьакI къе­це­патан уьлквейрани лезги диаспорайри чпи тухузвай кIвалах­рикай, кьилинди, чеб авайдакай хабарар раижзава.

Краснодардин крайдин Новороссийскда гзаф лезгияр авайдакай чаз фадлай малум я. Мукьвара заз ана яшамиш жезвай Марат Гьажиева хабар гайивал, шегьерда лез­гийрин тешкилат ачухунин мес­эла кьилиз акъатнава. Адан кьиле акъвазнавайдини кар алакьдай ­жегьил  Адилхан  Бедирханович  Къагьриманов  я.

Ам 1984-йисан 30-майдиз Мегьарамдхуьруьн райондин Кучун-Къазмайрин хуьре дидедиз хьана. 2001-йисуз хайи хуьруьн мектеб куьтягьна, 2003-йисуз армиядин жергейра Иркутскдин областда ракетайрин кьушунра кьве йисуз къуллугъ кьилиз акъудна.

2007-йисалай инихъ А.Къагьриманов Новороссийск шегьерда яшамиш жезва. Ина эцигунрал кIва­лахна, вуздикни экечIна, гуьгъуьнлай карчивилел машгъул жез га­тIун­на, эцигунрин рекьяй вичин гъвечIи фирма ачухна.

Шегьерда яшамиш жезвай хейлин лезгияр сад-садахъ галаз тани­шарунин, хъсан рафтарвилер арадал гъунин, халкьдин милли меденият, адетар хуьнин ва машгьурунин макьсаддалди Адилхан Къагьриманова са фикирдал алай ватан­эгьлийрихъ галаз санал шегьерда лезгийрин жемиятдин тешкилат арадал гъуник кьил кутуна.

Адилхан Къагьримановавай за шегьерда яшамиш жезвай лезгийрикай, жемиятдин тешкилатдин вилик акъвазнавай кIвалахрикай ихтилат авун тIалабна.

“Новороссийскда лезгияр саки агъзур кьван ава. Гьелбетда, вирибурухъ галаз алакъаяр арадал гъиз гьелелиг алакьнавач. Исятда чун чаз чизвай, яни ватанпересвал, милливал хуьнин умуми мурадди сад-садав агуднавай лезгийрин кьадар 400-далай артух я. Шегьерда авай лезгийриз куьмекар гунин, вузрик экечIзавайбурун тереф хуьнин, чи милли меденият къалурунин му­раддалди тешкилат кардик кутунва. Мукьвара шегьердин администра­цияда жемиятдин тешкилатрин кьиле акъвазнавайбурун иштираквал авай гуьруьш кьиле фена. Анал чна чи диаспорадиз кабинет чара авунин месэлани къарагъарна. Лезги чIалан гафарганар, ктабар, яржар эцигна, гуьруьшар кьиле тухудай ма­кан туькIуьриз кIан­зава. Чи умуми­ мурад къариблухда авайбурун  ватанпересвилин руьгь хкажун я”, — лугьузва А.Къагьриманова.

Ибурулайни гъейри, ватан­эгьлийриз Новороссийскда вири дуьнь­ядин лезгийрин форум кьиле тухудай фикирни ава. Агалкьунар хьурай!

К. Ферзалиев