И мукьвара РД-дин туризмдин ва халкьдин художественный сеняткарвилерин рекьяй Министерстводин коллегиядал, 2017-йисан нетижаяр кьуналди, аялар сагъарунин метлебдин “Ахцегь” ва “Гуниб” санаторияр республикада лап хъсанбур яз гьисабна. РД-дин туризмдин министрдин везифаяр вахтуналди тамамарзавайди тир Рабият Закавовади “Дагъустанда санаторно-курортный хел вилик тухунай” и медидарайрин руководителар тир Жамиля Зейналовадизни Али Мегьамедоваз дипломар гана.
Республикадин аялрин “Ахцегь” тIвар алай ревмакардиологиядин санаторий, райцентрадивай 5 километрдин хкатна, Ахцегь вацIун кудай дарман ятарин чешмейрал — гуьнедик, гьуьлуьн дережадилай 1100 метрдин кьакьанда экIя хьанва. Ада кьунвай 1,46 гектардин майдандикай 0,96 гектар багъ я. Чими ва кудай дарман ятарин (сероводород, кремневый кислота квай и ятар гидрокарбонатно-хлориднонатриевыйбурук акатзава) чешмеяр ГОСТ-дин истемишунрив кьунва. Аялар сагъарунин карда ина гьакI михьи гьавадикай, гуьзел тIебиатдикай, кфетлу тIуьнрикай, тешкилнавай къулай шартIарикайни себеб жезва. Кьуьд-гад кардик квай ина духтуррин теклифдин ва минздравдин пулсуз путёвкайрин бинедаллаз 7-17 йисалди яшда авай ва чпиз жалгъайринни рикIин кпулрин ва дамарра иви къекъуьнин къурулушдин азарар авай аялар кьабулзава.
Аялрин “Гуниб” санаторий Гуниб хуьривай 7 километрдин мензилда, гьуьлуьн дережадилай 1700 метрдин кьакьанвиле, шамагъаждин тамун патав, дагълух гуьзел тIебиатдин къужахда ава. Йиса рагъ авай йикъар пара хьуни, надир гьавади, михьи ятари инсандин сагъламвилиз хъсан таъсирзавайвиляй инизни тIебиатдин халис дарманхана лугьузва. “Гуниб” санаторийда кьетIен фикир аялрин бронхиальный астма, хронический пневмония, бронхит, жигеррин ва мекьи хьуникди арадал къвезвай бязи маса азарар сагъаруниз гузва.
Эхь, республикада неинки са дарманар ишлемишуналди, гьакI дагъларин тIебиатдин надир шартIарикай хъсандиз менфят къачуналди, аялар нетижалудаказ сагъар хъийизва. И жигьетдай “Ахцегь” ва “Гуниб” санаторийрин тIебии шартIар Россиядин ва дуьньядин машгьур пара санаторийринбурулай хъсанбур я.
Дашдемир Шерифалиев
