Гилийрин школада чешнелу аялрикай сад 10-классда кIелзавай Мирзебалаева Полина я. КIелунрилай гъейри, адан рикI спортдални ала. 3-классдилай ам спортдин гьар жуьре секцийриз физва, алай вахтунда ГТО-дин нормативар агалкьунралди вахкузва. Школада каратэдин секция кардик акатайла, дагъви руша спортдин и жуьредайни вердишвилер къачун кьетIна.
Рушан алакьунар акур адан тренер Мурад Амаханован теклифдалди Полина райондин ДЮСШ-да каратэдин тренер Багьауддин Девришева райондин хкянавай командадик кутуна. М. Амаханов ягъалмиш хьанач: са тIимил вахт арадай фейила, Полинади каратэдай райондин акъажунра 1-чкаяр кьуна. Гуьгъуьнлай ада неинки райондин, гьакI республикадин ва Россиядин дережада авай акъажунрани иштиракна.
2013-йисуз Пятигорскда 15-17 йисан яшда авай рушарин арада киокусинкай каратэдай Кеферпатан Кавказдин федеральный округдин кIвенкIвечивал патал кьиле фейи акъажунра Полинади 1-чка (38 кг) кьуна.
Гуьгъуьнлай ада Домбайда, Къизилюртда, Бавтугайда, Избербашда, Махачкъалада, Черкесскда, Дондал алай Ростовда киокусинкай каратэдай Кеферпатан Кавказдин федеральный округдин, Дагъустан Республикадин, Карачаево-Черкессия республикадин кIвенкIвечивал патал кьиле фейи акъажунра, Россиядин чемпионатда 1-чкаяр кьуна.
Геннадиянни Гуьлзаманан хизанда чIехи жезвай пуд веледни спортсменар я. 11-классда кIелзавай чIехи руш Элинади волейболдай райондин хкягъай командадик кваз акъажунра иштиракзава. 4-классда кIелзавай Ильяс, вичин кьвед лагьай вах Полина хьиз, каратэдал машгъул я.
Мирзебалаеврин хизанди спортдин кукIушар муьтIуьгъардайдахъ чун инанмиш я. Югъур хьурай!
Фазила Абасова
