Илимдин, зегьметдин рекье гъиле кьур кардив сабурдалди, мукьуфдивди, рикl гваз эгечlуни зурба нетижаяр арадал гъида. Чи куьруь ихтилат вичиз гьа ихьтин ерияр хас тир лезги алим Ашраф Баламетовакай я.
Тlвар-ван авай алим, технический илимрин доктор, профессор, Вирихалкьарин Экоэнергетический Академиядин член, “Элетроэнергетический системадин тайинарнавай къайдаяр” илимдин хилен регьбер Ашраф Баламетович Баламетован ери-бине Кцlар райондин Эчlехуьряй я.
Алимди электроэнергетикадиз, информацийрин технологиядиз итиж ийизва. 1971-йисуз ада Азербайжандин М.Азизбегован тlварунихъ галай нафтlадинни химиядин институт “Электрический станцияр” пешедин рекьяй куьтягьна ва гьа и йисуз И.Г.Есьманан тlварунихъ галай Азербайжандин энергетикадин НИИ-дин къуллугъчи хьана, ам и институтдин аспирантурадикни экечlна. 1980-йисуз Г.М.Кржижановскийдин тlварунихъ галай ЭНИН-да “Муракаб электрический сетрин тайинарнавай къайдаяр гужлу ийидай рекьер хкажун” темадай диссертация хвена. Ада Бакудин Вирихалкьарин политехнический институтда тарсар гана ва 1994-йисуз Новосибирскдин технический госуниверситетда докторвилин диссертация хвена.
Чи ватанэгьли хейлин проектрин иштиракчи, Америкадин библиографиядин институтдин ахтармишунрин меслятчийрин идарадин ва Вирихалкьарин электроэнергиядин зурба CIGRE ва IEEE системайрин советдин член, Вирихалкьарин энергетикадин академиядин академик, РФ-дин электротехнический илимрин академиядин член я. 2004-йисуз ам академик Юсиф Мамедалиеван тlварунихъ галай медаль гуниз лайихлу хьана.
Къейд ийин, профессор А.Баламетова пешедин рекьяй гзаф кьадар цlийи жуьредин менфятлу теклифар ганва, абур уьмуьрдизни куьчуьрмишнава. Адан регьбервилик кваз Азербайжандин энергосистемада кар алай гзаф кlвалахар кьилиз акъуднава. Адан иштираквал аваз ЕС ЭВМ ва ПЭВМ патал арадал гъайи программаяр радиальный ва электричестводин сетрин комплексра ишлемишзава.
Ашраф Баламетович 260-далай гзаф илимдин кlвалахрин, гьа жергедай яз 5 монографиядин автор я. Дуьньяда машгьур лезги алимдин монографийрикай сад Германияда чапдай акъатнава. Кьетlендаказ къейд ийин, алимдин илимдин 28 кlвалах цlийи затlар арадал гъуниз ва абур кардик кутуниз талукьбур я. Адан регьбервилик кваз тамамарнавай илимдинни техникадин 95 гьахъ-гьисаб “Азерэнержи” ЭЭС-дик кутунва.
Чаз лезги алимдихъ дуьньядин дережада мадни зурба агалкьунар хьана кlанзава.
«Лезги Газет»
