ЦIийи йисан вилик квай йикъара Москвада Бразилиядин джи-джитсудай (ACB jj тешкилатдин версия) кьиле фейи дуьньядин чемпионатдикай Вологда шегьердай тир тренер Алексей Красикова соцсетра вичин чина кхьенвай гафари зи фикир чпел желбна. “Дуьньядин чемпионат — кесерлу акъажунар — аламатдин 4 югъ кьулухъ галама. Шаксуз, ибур яргъалди рикIел аламукьдай, гьар са спортсмен патал чпихъ дерин метлеб авай йикъар, спортдин серенжем хьана. Бразилиядин джиу-джитсудал рикI алай ксар патал Москвадин чемпионат халис сувариз, адал машгъулбуруз чпин устадвал вини дережада аваз къалурдай ачух майдандиз элкъвена. Чи шегьердин спортсменривай чемпионатда кIвенкIвечи чкаяр кьаз алакьначтIани, абуруз дуьньядин жуьреба-жуьре уьлквейрай, гьакI чи уьлкведин жуьреба-жуьре регионрай атанвай викIегь пагьливанрихъ галаз чпин къуватар ахтармишдай, абурун тежриба аквадай, гележегда чпин устадвал хкажунин рекье адакай менфят къачудай мумкинвал хьана”,- кхьенвай ада.
И чемпионатди чи рикIера мадни хуш майилриз, гьиссериз чка гана. Винидихъ тIвар кьунвай тренерди лугьузвай викIегь спортсменрин арада лезги кьегьаларни авай. Кьилиндини, ана иштиракай саки вирида кIвенкIвечи чкаяр кьуна — дуьньядин чемпионвилин ва призервилин тIварариз лайихлу хьана. Зарафат туш, акъажунра дуьньядин жуьреба-жуьре уьлквейрай тир 3000-далай виниз спортсменри чпин устадвал къалурна. 4 юкъуз тамам 4 агъзурдав агакьна бягьсер кьиле фена…
Джиу-джитсудай дуьньядин чемпионвилин тIварариз лайихлу хьайибурун арада чи газет кIелзавайбуруз фадлай танишбур хьиз, цIийи тIварарин сагьибарни ава. Ингье абур: Артур Агъаширинов (66 кг), Эйнар Экберов (60 кг), Ислам Гьуьсейнов (75 кг) ва Далгат Османов (66 кг), Амин Бабаев (70 кг), Рамазан Мамеев (80 кг), Аяз Нагъиев (60 кг), Сагид Бабаев (95 кг). Дуьньядин чемпионатдин сергьятра аваз жаванрини чпин устадвал къалурна. Абурун жергедай тир Рагьман Эседуллаев (ада абсолютный чемпионвилин тIварни къазанмишна), Азизагъа Азизагъаев (кьведни 70 кг), Ибрагьим Гьажиметов, Имамедин Эседов (кьведни — 55 кг), аялрикайни Руслан Сайидов (50 кг) кесерлу акъажунра кIвенкIвечи чкаяр кьуналди тафаватлу хьана.
Ихьтин са карни къейд ийиз кIанзава: чемпионатда джиу-джитсудай (спортдин и жуьреда кьилин 5 — лацу, вили, беневша рангунин (фиолетовый), шуьтруь ва чIулав рангунин чIулар ава. Кораллдин ва яру рангунинбурни ава, абур Бразилиядин джиу-джитсу жуьредиз 40-далай виниз йисар бахш авурбуруз гузва), гьар са рангунин чIулунин сагьибдиз анжах гьа вичин хьтин рангунин чIул авайбурун арада бягьсера иштиракдай ихтияр ава (мисал яз, Артур Агъаширинова шуьтруь рангунин чIулар авайбурун арада иштиракна ва дуьньядин, гьакIни абсолютный чемпионвилин тIварар къазанмишна). Мадни и чемпионатда иштиракай чIехи пай спортсменри грэпплингдай, яни кимоно алачиз “no GI” жуьредайни чпин устадвал къалурна. Гьаниз килигна чи спортсменрикай кьве жуьредайни гъалибвал къазанмишайбур ава. Кьилди къачуртIа, Эйнар Экберова джиу-джитсудай -1, грэпплингдай 2-чкаяр кьуна. Кьве жуьредайни 1-чкаяр кьурбурун арада Далгат Османовни (66 кг) ава. Спортдин и жуьредай кIвенкIвечи чкаяр кьурбурун жергедай яз, Аяз Нагъиеван (3-чка, 65 кг), Шакир Шемехован (2-чка,70 кг), Райнудин Къадирован (75 кг-дин заланвал авайбурун арада ва абсолютный категориядай 2- ва 3-чкаяр), Ислам Гьуьсейнован (1-чка, 75 кг), Гуьлмегьамед Гуьлмегьамедован (3-чка, 100 кг-дилай артух) тIварарни кьаз кIанзава. Ветеранрин арада кьиле фейи бягьсера Осман Эфендиев (75 кг) -1 ва Рашид Мегьтиев 1 ва 2-чкайриз (80 кг-дин заланвиляй ва абсолютный категориядай) лайихлу хьана.
Эхирдай чаз вичин ери-бине СтIал Сулейманан райондин Эминхуьряй тир Далгат Османован агалкьунрикай куьрелди суьгьбетиз кIанзава. Винидихъ тIварар кьунвай са шумуд спортсмен хьиз, Далгат Османовни икьван гагьди спортда еке агалкьунар къазанмишиз алакьнавайбурукай сад я. Чаз ам газет кIелзавайбурухъ галаз мукьувай танишардай мумкинвал хьанвачир. Д.Османов исятда Даггосмедакадемиядин студент я, Махачкъалада яшамиш жезва. Вичин 12 йис тамам хьайидалай инихъ спортдал машгъул тир ам Россиядин, СКФО-дин ва Дагъустандин са шумуд сеферда чемпион я. Джиу-джитсудай кьиле тухвай дуьньядин чемпионатра 2018 ва 2019-йисарани Д.Османов гъалиб хьанай. 2020-йисуз Далгата грэпплингдай Москвада кьиле фейи Европадин ачух Кубок къазанмишна.
Рагнеда Рамалданова
