2022-йис патал “Лезги газетдин” 10 ва адалай гзаф экземплярар кхьиз, пулдин такьатар редакциядив агакьарай вири рухвайризни рушариз чна рикIин сидкьидай сагърай, куь руьгьдин жумартвал мадни артух хьурай лугьузва. Агъадихъ чна абуруз ЦIийи йисан тебрикар рекье твазва.
Дагъустандилай къеце
Абасов Мамедаз — Красноярск шегьерда эцигунрин чIехи холдингдин векилдиз:
Вуч гаф ава мердвилиз,
ЧIугваз агьвал мад виниз,
Тазвач руьгьдин майданра
Суални сир сертвилин.
Агъажан ва Рустам Адигуьзеловриз — Москвада яшамиш жезвай карчийриз:
Зар алайбур тIварарал,
Пар алайбур крарал,
Чан гъизвайбур хьиз я заз
Гьатта экуьн ярарал!
Балакишиев Заураз — Краснодарда яшамиш жезвай вурварви карчидиз:
Тухузва чун Вурвариз
Руьгьдин хци лувари.
Мерд рухвайри чи гьар югъ
Элкъуьрзава сувариз!
Гъазалиев Нариманаз — Москвада яшамиш жезвай ахцегьви хциз — карчидиз:
Сагърай чи хва Нариман —
Девирдин я къагьриман!
Миллет патал сидкьидай
Амадаг я даима!
Гьасанов Васифаз — Ярославлда яшамиш жезвай къурушви хциз — карчидиз:
Европадин чIередив
Альпинистрин жуьредин
Гъил вугузва мердвилин,
Яру Дагъдин жегьре хьиз!
Керимов Арифаз — Москвада ФЛНКА-дин регьбердиз:
ТIвар чIехи я — Ариф я.
Ван къвезвайди тариф я:
“Чидай хва туш яшинда
Руьгь къалурун зайиф яз!”
Магьсудов Алимегьамедаз — Нижний Новгородда яшамиш жезвай карчидиз:
Гъил агакьриз мердвилин
Акьван яргъал меркезрай,
Авач метягь, мал гьеле,
Куь гьуьрметар эвездай.
Садикьов Максимаз — Краснодарда яшамиш жезвай карчидиз:
ТавуртIани тагькимар,
Чи жумарт хва Максима
Руьгь паталди миллетдин
Жуьрэт хуьзва даима.
Эмиргъаев Альбертаз — Алтайда яшамиш жезвай карчидиз:
Хабар кьуртIа АрхитIа,
Вичин бине жагъида.
Куьмек гурла багърийриз,
Суал хьана алгъидач!
Дагъустандин шегьеррани районра
Ахцегьа
Абдулкеримов Магьмудаз — “Просвещение” фондунин регьбердиз:
“Чирвал гьахъ я!” — эзбериз,
Чи камалдин регьберди
Къалурзава несилриз
Вилик финин рекьер дуьз!
Дербентда
Исмиханов Рамизаз — девирдин карчидиз, миграгъви хциз:
Гьисабдач за лайихар,
Кутаз жедач синихар.
Халкьдин мецел гьамиша
Ала анжах тарифар!
Межидов Абилаз — лайихлу юристдиз, писателдиз:
Хва я халис бубадин!
Гьар са хуьруьз, убадиз,
Гъил вугуда захадиз,
РикIин сидкьи успатиз…
СтIал Сулейманан районда
ЦIийи Макьа
Эмиргьамзаев Рамазаназ — пенсионердиз, ветерандиз:
АкуртIани яхундиз,
Гьар келима — рахун дуьз:
“Руьгьдин къашар хуьн патал
Гьална кIанда фургъун дуьз!”
ТIварар кьамир лагьай куьмекчийриз — дестекриз:
Даяхар я газетдин,
Куьмек гузвай гьамиша.
Шад гьиссерив ацIанвай
Кьабула чи алхишар.
Каспийскда
Агьмедов Тагьираз — “Каспий- теплосервис” ООО-дин гендиректордиз:
КьепIирви хва Тагьира,
Устадвилиз магьир яз,
Куьмекда чаз мукьувай,
Руьгьдай халис шаир яз.
Гьажибубаев Назираз — “Дагдизель” заводдин коммерческий директордин заместителдиз:
АватIани четинвал,
Хуьзвач рикIи секинвал.
Халкьдин руьгьдиз харжзава
Вичин гьар са мумкинвал.
Къулиев Рамазаназ — къурушви хциз, карчидиз, меценатдиз:
КIандач яргъи рахунар,
Чан гъидай хьиз махунал,
Газет-журнал паталди
Хемир хуьзва хвахуна!
Магьамдалиев Яралидиз — теплосетрин зегьметчидиз:
Я гьакъикъи зегьметчи,
Кардин къадир, гьуьрмет чиз,
Газет патал гьар йисуз
Жезва халис куьмекчи!
Фатуллаев Имамудиназ ва Азизов Абдуллагьаз — Дуьм-дуьз механикадин заводдин гендиректордиз ва кьилин бухгалтердиз:
Дуьм-дуьз кIанда терезар,
Авачиз са гъерезар.
Ийизвай кьван гьуьрметрин
Гьисаб кьунвач гьеле за!
Къизлярда
Атамов Низамидиз — КЭМЗ-дин гендиректордин заместителдиз:
Вине твазва Лезгивал,
Алаз хци вергивал.
Алудзава устаддиз
Девирдилай ичIивал.
Нагъиев Рамазаназ — Санкт-Петербургдин ИНЖЭКОН-дин филиалдин регьбердиз:
Гьикьван четин уламра,
Негьиз куьтвал, авамвал,
Илимрин багъ хуьзвай хва,
Сидкьидай чи салам ваз!
Махачкъалада
Агьмедов Джейгьуназ — Махачкъалада авай имам аш — Шафиидин тIварунихъ галай мискIиндин имамдиз:
Ганвай кас я муъминвал,
Гъейратдизни — секинвал.
Руьгьда ерли къалурдач
Аквазвайди четинвал.
Адилов Магьарамаз — девирдин меценатдиз:
Лайих тирвал кьегьалдиз,
Фу нез, яд хъваз гьалалдин,
Ачухзава несилриз
Рекьер михьи агьвалдин.
Азаев Жабираз — “Къуруш” центрадин сагьибдиз:
Гъавурдаваз базардин,
Кар тухузва пайгардиз.
Куьмек-емек гудайла,
Гъил ачухда кьадар чиз.
Алисултанова Фаридадиз — 16-нумрадин юкьван школадин директордиз:
Чи мектебдин бинедиз
Къуллугъзава чешнедив.
Милли руьгьда сугъулвал
Кьабулай туш гьелелиг.
Асаханов Шагьпазаз — эминхуьруьнви карчидиз, меценатдиз:
Мяден хьиз я мердвилин,
Чка жагъич пертвилиз.
Гъил къакъажда уьтквемдиз,
АкуртIа са дерт вилиз.
Ашукь Алиханаз — манидардиз, меценатдиз:
Ифин гъида симерал
Мелерани демера.
Гьарайдизни гьамиша
Гьай жеда ам эверай!
Велиев Эзединаз — ДГУ-дин математикадин факультетдин доцентдиз:
Девир я им рекъемрин,
ВикIегьбурун, уьтквемрин.
Акъвазда чи къуллугъда
Гьекь ядалди кьекьемриз!
Гьамидов Фахрудиназ — кьурагьви хциз, къуллугъчидиз:
Вуч гаф ава къилихдиз,
Кутаз жедач синихдик.
Катран саягъ къуллугъда
Акъвазнава синифдин!
Къадималиев Мегьамедзакираз — “Дагъустан” агрохимкъуллугъдин гендиректордиз:
Вуч хъсан я чилер хуьн,
ЦIийи хвалар, хуьлер хуьн!
Макьсад сад я: саламат
Руьгьдиз мягькем эллер хуьн!
Къадиров Къадираз — А.Тахо-Годидин тIварунихъ галай НИИШ-дин къуллугъчидиз:
Къаравулчи адетдин,
Къанун-къайда гуьзетиз,
Кьабул жедач руьгьдивай
Кирс килигун газетдиз.
Магьмудов Фаргьадаз — “Махачкъала” автоцентрадин сагьибдиз:
Алхишзава Фаргьадаз
Яргъадани мукьвада:
“Артух хьурай генани
Чи руьгь патал такьатар!”
Мегьамедкеримов Мурадаз — девирдин карчидиз:
Генг я майдан мурадрин,
Рехъ гуз руьгьдин устадриз.
Мад вине хьуй ви гьуьрмет,
Гьунарлувал успатиз!
Мирзегьасанов Насрудиназ — 12-нумрадин юкьван школадин директордиз:
Басрух гурла дердери,
Сада-садаз эвериз,
Алакьзава гьамиша
Куьмекрин женг эзбериз!
Пирмегьамедов Разимаз — девирдин карчидиз:
Вилик тухуз карчивал,
Авачиз са харчивал,
Акьул, камал къачузва
Газетдин гьар чарчивай.
Рамазанов Рамазаназ — РД-дин МЧС-дин цIаяр кьуниз акси къурулушдин кьилин пешекардиз:
Квахь лугьуда хатайриз,
Чуьнуьх тежез далдайрик.
Экв багъишда чим галай
Хмулди кьур къузайриз.
Салагьов Агъаметаз — ДГТУ-дин преподавателдиз:
Вине твазва алимвал,
Чи несилриз — муаллимвал.
Куьмек гурла зайифдаз,
Хуьзва, хва я, Итимвал!
Шагьбанов Низамаз — 13-нумрадин гимназиядин муаллимдиз:
Вичин гьар са къадамдиз
Къуллугъзава низамдиз.
Гьазурдайла женгчияр,
Гьайиф къведач къазанжи.
Эседов Адилагьаз — девирдин карчидиз:
Вичин гьар са къадамдив
Умуд хуьзва илгьамдиз.
Ихьтин хваяр тушни бес
Герекбур чи аямдиз!
Эсетов Азединаз — ДГМУ-дин доцентдиз, Халкьдин духтурдиз:
Баладизни дидедиз,
Дуьньядизни уьлкведиз
Гекъиг тежер дестек я
ЧIехи духтур Азедин!
Эфендиев Маилаз — МЧС-дин ветерандиз, шаирдиз:
Я гьуьрметлу ялцугъви,
Вуч чIехи я къуллугъ ви!
“Дуьзвал хьурай виринра!” —
РикIинди я буйругъ ви.
Юнусов Хидир-Зулданаз — къанун-къайда хуьнин органрин ветерандиз, РД-дин лайихлу художникдиз:
Шикилра ви экв ава,
Мублагьвал ва эрк ава!
Гьавиляй я, чи дустар,
Къакъат хьана, тек авач!
Жувазни:
ГьикI ийидач мирзевал —
ЧIалар кхьин вижевай!
Ял ядайла, ашунал
Герек жезва жуьже ваз…
Мердали Жалилов
