13-январь — Россиядин печатдин югъ
Гьуьрметлу дустар! Квез аквазвайвал, и чин чна “Лезги газет” 2022-йис патал кхьиз, чпин хсуси такьатар ва гьакI масабурун мумкинвилерни санал желб авур рухвайризни рушариз тебрикрикай туькIуьрнава.
“Са ибур яни бес милли газетдал — миллетдин руьгьдин къулал ашукьбур?” лугьунни мумкин я. Куьн гьахъ я. Газет патал, кьве гъил къакъажна, кIвалахзавай ксар чахъ вири хуьрера, районра, шегьерра ава. Эгер гьар са хци ва руша, агьилди ва жегьилди, милли культура, чIал, литература, адетар, тарих дериндай чирун, хуьн, виликди тухун, машгьурун рикIел алаз, гьатта са газет кхьейтIани, ам чи виридан меденивилин къайгъуда авай кас я. Эхь, стIалрикай я булахар жезвайди. Булахар гзаф галай вацI кьурадач, ада вичин рехъ гьуьлерив кьван агакьарда!
“Лезги газет” цIи 6500-далай гзаф агьалийри кхьенва. Баркалла абуруз! Мумкин я, кхьиз кIанз, гьелелиг агакь тавунвайбурни хьун. Абуруз чи газет йисан кьиляй-кьилиз кхьиз, вахчуз, кIелиз жезвайди чир хьайитIа хъсан я. И кар газетрин киоскар авай чкайра (Ахцегьа, Кьасумхуьрел, Мегьарамдхуьре, Белижда, Дербент, Огни, Каспийск, Махачкъала, Къизляр, Хасавюрт, Сухокумск шегьерра…) гьа киоскрай гьар вацран 20-число агакьдалди кьилиз акъудиз жеда. Почтадин отделенийрани ашкъи авайбурувай исятдани газет кхьиз жеда. Эгер январдин вацра кхьейтIа, газет февралдилай хкведа ва икI мад.
Амма им мехъер алатайдалай кьулухъ мубаракар ийиз физвай мисал жезва. Газет, журнал вахтунда кхьин гьам кIелзавайбуруз чпиз, гьам газет акъудиз кIвалахзавайбуруз (чаз) хъсан я.
Гьар гьикI хьайитIани, алатнавай йисара хьиз, цIини чи газетдин тираж амай милли газетрилай артух я! Сагърай лезги халкь! Куь садвал, савадлувал, гьуьрмет, чIалал ва культурадал ашукьвал, жува-жуваз гьуьрметун себеб яз, чахъ руьгьдин къуватар гзаф авайди чир жезва. Гужлу къуш чIехи къармахарни хци яргъи кIуф алайди ваъ, мягькем лувара гзаф цIакулар аваз, кьакьан цавар муьтIуьгъарзавайди тирдал шак алач.
КIелзавайбур ва мухбирар гзаф авай газет къуватлуди яз амукьда! “Лезги газет” гьа гужлу къуш хьиз я!
13-январдиз чи уьлкведа Россиядин печатдин югъ-сувар къейдзава. Ам, гьелбетда, сифте нубатда журналистрин сувар я. Газет кIелзавайбурун суварни я!
Чна квез вирибуруз руьгьдин къуватар артухарзавай и сувар рикIин сидкьидай мубаракзава, азизбур! Къуй квехъ мягькем сагъламвал, кIвалера гьуьрмет, муьгьуьббат, берекат хьурай!
Дагъустандин халкьдин шаир Арбен Къардаша “Лезги газет” миллетдин “эркни руьгь” яз гьисабзава. Шаирди дуьз къимет ганва.
Чи эрк сагърай! Чи руьгь сагърай! Амин!..
“Лезги газетдин” редакция
