Алатай йисан декабрдин эхирра Дагъустандин меркезда ва Каспийск шегьерда 44 “А” ва 100-нумрайрин автобусрин гьерекат акъваз хьана. И кардин себеб Махачкъаладин инсанар санай масаниз тухудай улакьрин 2-нумрадин кархана (Махачкъаладин 2-ПАТП) банкрот хьун я. Карханадал алай буржар 250 миллион манатдив агакьзава.
10-январдиз РД-дин Гьукуматдин Председатель Абдулпатагь Амирханова автобусрин гьерекат кардик кухтунин месэлайриз талукьарнавай совещание кьиле тухвана. Адан сергьятра аваз, Махачкъаладин 2-ПАТП-дин хсусиятда авай автобусар Каспийскдин АТП-див кирида вугудай къарар кьабулна. Амма, якъин хьайивал, саки вири автобусар туьхкIуьр хъувунин игьтияж ава. Каспийскдин АТП-дин генеральный директордин везифаяр вахтуналди тамамарзавай Мегьамедгьажи Ражабова къейд авурвал, и макьсадриз тахминан 8-10 миллион манат пул герек жеда.
Абдулпатагь Амирханова кIвалахзавай автобусар, энгел тавуна, кардик кухтунин тапшуругъ гана. Амай улакьар къайдадиз хкун патал герек жезвай пулдин такьатар республикадин бюджетдай чара ийидайвал я.
Чи мухбир
