Алатзавай йис гьихьтинди хьанатIа, гьадан нетижаяр кьунин жуьреда фикирар лугьун гзафбур патал фадлай адетдиз элкъвенва.
ТIугъвалдинди яз давам хьанатIани, цIинин йис “Лезги газетдин” редакциядин къуллугъчияр патал вакъиайрив ацIайди хьана. Алатай йисуз къейд ийиз тахьай газетдин 100 йисан юбилейдин мярекат цIи кьиле фена. Машгьур шаир ва публицист Мердали Жалилова, къенин аямдин бажарагълу писатель ва публицист Нариман Ибрагьимова эдебиятдин эсеррикайни публицистикадин макъалайрикай ибарат са шумуд ктаб чапдай акъудна. РД-дин милли сиясатдин ва динрин крарин рекьяй министерстводи малумарай кьве конкурсда гъалибвал къачуналди, Н.Ибрагьимова неинки вичин, гьакI газетдин тIварни виниз хкажна.
Редакцияди кьил кутунвай “Хайи чIал хуьн” проектдин сергьятра аваз газетдин кьилин редактор М.Ибрагьимовахъ галаз чна аялар патал “100 тапшуругъ” тIвар ганвай сад лагьай ктаб чапдай акъудна. Мумкинвилериз килигна, и проектдин сергьятра аваз чаз мад ктабар акъуддай фикир ава. Кьилинди ам я хьи, арадал гъизвай затIар надирбур ва герекбур, чпихъ игьтияж авайбур жен. Шад жедай кар ам я хьи, винидихъ къалурнавай ктабдин суракьда авайбурун кьадар тIимил хьанач, гзафбур чи уьлкведин жуьреба-жуьре шегьерра авай лезгийривни агакьнава.
“Лезги газетдин” редакцияди гьар йисуз Махачкъаладинни Каспийскдин мектебра кIелзавай лезги аялрин арада хайи чIалай кьиле тухузвай олимпиадани хъсан дережада тешкилзавай мярекатдиз элкъвенва. ЦIинин йисузни и шегьеррин лезги аялри хайи чIалай чпин чирвилер къалурна. “ЛЕКИ” фондунихъ галаз санал редакцияди Кьиблепатан Дагъустандин мектебра кIелзавай лезгийрин арада гьар йисуз кьиле тухузвай олимпиада чIалан сувариз элкъвена.
Газетдин чинилай “Чи ватанэгьлияр — гьар сана” рубрикадик кваз чеб Дагъустандилай къеце машгьур хьанвай, тарифлу крар кьилиз акъудзавай цIудралди чи ватанэгьлийрихъ галаз кIелчияр танишарна.
Бес виридалайни важиблуди вуч тир? Гьелбетда, — сагъламвал. Эвелни-эвел гьар са кас вич хуьнин, сагъламвал мягькемарунин крариз-гьерекатриз фикир гуниз мажбур хьана. Коронавирусдин тIугъвалди руьгьдай вегьейбурун, зайифарайбурун, азардин судурди акIажарайбурун, чи арайрай акъатайбурун кьадар гзаф хьана. “Коронавирус” гаф рахунра, кхьинра датIана давам жезва. Инсаниятдин зегьле ракъурзава и гафуни.
ТIуьрдалай хъинедайди хъсан жеда лугьудайвал, алатай йисалай къведай йис вири жигьетрай хъсанди хьуник умуд кутан. Руьгьдай ават тийин. Къуй цIийи йис цIийивилерни бегьерлувилер, шадвилерни агалкьунар гъидайди хьурай!
К.Ферзалиев
