Къиметар хкаж хьуникай
РФ-дин Президент В. Путина садлагьана къиметар хкаж хьуникай агьалияр хуьниз эвер гана. Адан фикир “ТАСС” чешмеди раижнава.
Къейд авурвал, пул къиметдай аватунин месэла акъвазарун патал мумкин тир гьар са серенжем кьабулна кIанда. Президентди алава хъувурвал, Россиядин гьукумдарар ватандашрин къазанжияр артухарунин кардал машгъул хьун чарасуз я.
Идалай вилик В.Путина Россиядани США-да къиметар хкаж хьунин гьерекатар сад-садав гекъигнай. Центробанкдин делилралди, 2021-йисан нетижайра Россияда инфляция 7,4-7,9 процентдикай ибарат я. Ноябрдин делилралди, США-да йисан инфляция 6,8 процентдиз барабар я.
Гьелягьар кьун давам жезва
США-дин вице-президент К.Харриса малумарнавайвал, чпин тереф, Украинадин гьалар себеб яз, Россиядиз акси “виридалайни гужлу”, садрани тахьай хьтин санкцияр кардик кутуниз гьазур я. Идакай “Новости” РИА-ди хабар гана.
Идалай вилик Еврокомиссиядин кьил У.Ляйена малумарайвал, эгер Россиядинни Украинадин арада авай часпардал къалмакъал арадал атайтIа, Евросоюзди гуя Москва тахсирлу яз гьисабда ва адаз акси санкцийрин кьадар мадни артухарда. США-дин гьукумдарри и жуьредин гьелягьар мукьвал-мукьвал кьазва, амма чпи датIана ийизвай къаришмишвилериз фикир гузвач.
Гуьруьшдин шартI
США-да хьайи Украинадин виликан векил В.Чарлыйди малумарнавайвал, Путин Зеленскийдихъ галаз анжах вичин шартIаралди гуьруьшмиш жеда. Адан гафар “Новости” РИА-ди раижнава.
Адан фикирдалди, эгер В.Зеленскийди Украинадин виликан президент П.Порошенкодин “политикадин карьера тергайтIа”, Россиядин Президент В.Путин адахъ галаз гуьруьшмиш жеда.
Идалай вилик Украинадин президентдин офисдин регьберди Зеленский Путинахъ галаз гуьруьш кьиле тухуз гьазур тирдакай лагьанай.
Государстводиз хиянатвал авуна лугьуз, 20-декабрдиз П.Порошенкодал шак вегьенвайдакай малумарнай.
Аксивалзавай агьалияр къарагъна
Афгъанистандин бунтар авай Панджшер вилаятдин агьалияр “Талибан” (Россияда къадагъа авунвай тешкилат) кIеретIдиз аксивал къалурун патал митингдиз экъечIна. Аксивал къалурун патал къарагънавай агьалияр аквазвай видеоролик “Военный обозреватель” чешмеди интернетда раижнава. Анай аквазвайвал, бунтчийри талибрин хура акъвазунин къуватрин кьиле авай Агьмад Масудаз куьмек гунин, адан тереф хуьнин гафар лугьузва.
ПIапIрус чIугунай жерме ийида
2022-йисуз пIапIрус чIугвазвайбурун “жибинриз” артухан зарар жеда. Идакай “Лента.ру” сайтди хабар гузва.
Икьван чIавалди анжах медицинадин идарайра, алишверишдин чкайра, складра пIапIрус чIугунал къадагъа алай. Гила юзан тийизвай объектрал, карханайра пIапIрус чIугунал къанундалди къадагъа жеда. Эгер ихьтин чкайра гумар акъуддайбур хьайитIа, абур цIаяр кьуниз аксивалунин хатасузвилин къайдаяр чIурунин гьакъиндай тир статьядай жерме ийида.
Идалайни гъейри, пIапIрусрин къимет багьа хьун давам жезва. 2021-йисуз абурун къимет 20 процентдин хкаж хьана. ПIапIрусар маса гунин жигьетдайни гьукумдин вилик-кьилик квайбуруз цIийи сергьятвилер кардик кутаз кIанзава.
Бедендик яргъалди кумукьзава
Эгер Америкадин алимри авунвай ахтармишунрин чIалахъ хьайитIа, коронавирус инсандин бедендик 230 юкъуз кумукьунни мумкин я. Идакай “Лента.ру” сайтда кхьенва.
Пешекарри ковиддикди кьейи 44 касдин беденар ахтармишнава ва абурун саки вири органра вирус авайдакай малумарнава.
Электронный паспортар
Россиядин МВД-дин миграциядин месэлайрин кьилин управленидин начальник В.Казаковади малумарайвал, Россияда электронный паспортар 2023-йисан январдилай гуз гатIунда, хабар гузва “ТАСС” чешмеди.
Тестикьарайвал, алай вахтунда МВД-ди, уьлкведин рекъемрин министерстводи ва маса органрини тешкилатри электронный паспортар гунин къайдайрин винел кIвалахзава. Виликамаз гузвай малуматралди, сад лагьай паюна и жуьредин паспортрин кьадар 100 агъзурдалай тIимил тушиз жеда.
Къецепатай — Россиядиз
Алай йисан 11 вацра къецепатан уьлквейрин саки 668 агъзур агьалиди Россиядин гражданство къачуна. 2020-йисан нетижайрив гекъигайтIа, цIинин йисуз чи уьлкведин ватандашвал тестикьарайбурун кьадар 105 агъзурдан артух хьанва.
«Лезги газет»
