Къумтуркъала райондин Тюбе поселокда медицинадин идараяр патал жими кислород гьазурдай завод эцигунин проект уьмуьрдиз кечирмишун пландик кутунва.
“Проектдин гьакъиндай теклиф “Творческие технологии” ООО-ди ганва. РД-дин гьукуматда хьайи гуьруьшдал компаниядин векил Андрей Зобнинцева хабар гайивал, цIийи карханади неинки здравоохраненидин идарайриз герек кислород, гьакIни халкьдин майишатдин карханаяр патал кислород ва азот гьазурда.
Фикирзавайвал, производстводихъ суткада 29 тонн кислород акъуддай гужлувал жеда. Проектдин къимет 760 миллион манатдиз барабар я. Кархана 2022-2026-йисара эцигда.
Къейд ийин, “Творческие технологии” ООО-ди республикадин образованидиз, здравоохраненидиз ва культурадиз талукь са шумуд проект гьазурзава.
“Региондин власть проект теклифай карханадиз государстводин патай куьмек гунин, гьа жергедай яз Тюбе поселокда инвестициядин проект кьилиз акъуддай чилин участок чара авунин мумкинвилиз килигна.
Теклифдин тереф Дагъустандин здравоохраненидин министр Татьяна Беляевадини хвена. Ада къейд авурвал,тIугъвалдикай азад хьайи вахтунда республикадивай жими кислород къунши регионризни гуз жеда”, — хабар гузва Дагъустандин гьукуматдин информациядин къуллугъди.
«Лезги газет»
