2021-йисан 9 вацран вахтунда Дагъустан Республикадин агьалийри ва мугьманри, шейэрин ва я къуллугърин гьакъи гудайла, 72 миллион сеферда банкарин картаяр ишлемишна.
Нагъд пул галачиз авур гьахъ-гьисабрин кьадар 51,4 миллиард манатдиз барабар хьана. 2020-йисан гьа и вахтунив гекъигайла, винидихъ чпикай лагьанвай делилрин кьадар, талукь яз, 47,6% ва 53,4% процентдин гзаф хьанва.
Нагъд пул галачиз авур савдайрин кьадар, банкарин картаяр ишлемишуналди тамамарай гьерекатрин санлай къачур кьадардив гекъигайла, 15,9 процентдин гзаф хьанва. Нагъд пул галачиз шей маса къачудайла харж авур такьатрин юкьван кьадар 710 манатдиз, банкунин картадилай пул элягъун патал тамамарай серенжемрин юкьван кьадар 12,8 агъзур манатдиз барабар хьана.
2021-йисан 1-октябрдин делилралди, региондин мулкунал шей маса къачудайла, пул гуз жедай 2 миллиондилай гзаф картаяр акъуднава, республикада 797 банкомат ва 8 агъзур электронный терминал ава.
“Республикада банкарин картаяр кьабулиз жедай алатрин къурулуш гегьеншарзава: алишверишдин ва къуллугърин карханайрани тешкилатра нагъд пул галачиз гьахъ-гьисабар ийидай мумкинвал гудай 9 агъзур алат эцигнава. Кьилди къачур объектрал QR-код ишлемишуналди пул гуз жедай мумкинвал хьанва. Гьа са вахтунда счетдал алай пулуникай кIан хьайи вахтунда ва кIан хьайи чкада менфят къачудай мумкинвал гудай онлайн-къуллугъар Дагъустандин гьар са агьали патал тIем акакьдайбур хьун лазим я. Им чна виридалайни вилик эцигзавай месэла я”, — къейдзава Дагъустан Республикада Россиядин Банкунин Отделение идара ийизвай Мурад Идрисова.
«Лезги газет»
