РФ-дин премьер-министр Михаил Мишустина  Дагъустандин электросетрин комплекс еримлу авун патал “Кеферпатан Кавказдин Россетар” компаниядиз 890,8 миллион манат чара авун  тапшурмишнава, хабар гузва  компаниядин информациядин къуллугъди.

Малум хьайивал, “Кеферпатан Кавказдин Россетар” компаниядиз 890,8 миллион манат чара авунин гьакъиндай къарардал  М.Мишустина къул чIугунва.

“РФ-дин Минэнергодиз 2021-йисуз  “Кеферпатан Кавказдин Россетар” ПАО-див субсидия яз агакьарун патал гьукуматдин ре­зервдин фондунай 890,8 миллион манатдин кьадарда аваз бюджетдин такьатар чара авун тапшурмишзава”, — кхьенва официальный интернет-порталда чапнавай документда.

Чара авунвай такьатар Дагъустандин  электроэнергия пайдай сетар гуьнгуьна хтунихъ ва ремонтрин бригадаяр патал махсус техника маса къачунихъ галаз алакъалу харжийрин пай эвез хъувун патал ишлемишда.

Идалай вилик “Россетри” хабар гайивал, Дагъустандин электросетрин комплекс авай гьал бес кьадар финансар чара тавунихъ, абур неинки еримлу авун, гьатта адетдин ре­монт­дин­ кIвалахар лазим тир дережада та­ма­ма­рун­ патал такьатар бес тахьунихъ га­лаз­ ала­къалу я. И кардин  асул себеб тарифрин чешмейрин кьадар бес тахьуникай ва агьалийри ишлемишнавай электроэнергиядин гьакъи вахт-вахтунда тагуникай ибарат я лагьайтIа  жеда.

Алатнавай гзаф йисарин вахтунда ЖКХ-дин карханайрин патай агакьзавай гьакъидин кьадар юкьван гьисабдалди 12 процентдиз, агьалийрилай — 80 процентдиз барабар я. Идалайни гъейри, кьиле тухванвай аудитдин  бине­даллаз, агьалияр электроэнергиядалди таъ­минарзавай ва и кардин дурумлувилиз таъсирзавай электросетрин умуми кьадардикай “Кеферпатан Кавказдин Россетар” ПАО-ди анжах 43 процент ишлемишзава. Амай кьадар — ибур  иесисуздаказ гадарнавай ва я маса хсусиятчийрин эменни тир сетар я.

Идарадин пресс-къуллугъда къейдзавайвал, 2022-2023-йисар фикирда кьуна гьазурнавай электросетрин майишатдин кIва­лахдин дурумлувал хкажунин программадин гьа­къин­дай Россиядин Минэнергодин разивал къачунва. Ада тадаракар цIийи хъийидай,  объ­ектар цIийи кьилелай туьхкIуьрдай мумкинвал гуда. Программадин бинедаллаз чара ийидай такьатрин кьадар 7,68 миллиард манатдиз барабар я.

Гьа са вахтунда компанияди къейдзавайвал,  регионда ишлемишзавай  электроэнергиядин гьакъи вахт-вахтунда гудай къайда тахьуни программа уьмуьрдиз кечирмишдай  мумкинвал гузвач.

«Лезги газет»