1-сентябрдилай 25-декабрдалди коронавирусдиз акси рапар ягъай Махач-къаладин агьалияр “Lada Granta” автомобиль лотереяда къугъунин иштиракчияр хьана. Идакай “ТАСС” чешмеди хабар гана.
Къейдзавайвал, лотереяда вакцинадин рапар ягъай 75831 махачкъалавиди иштиракна. Гъалибчияр, РД-дин здравоохраненидин министерстводи къалурай сиягьдин бинедаллаз, кодар алай чарарин ва махсус генератордин куьмекдалди хкяна.
Гъалибчияр малумарунин шад мярекат Махачкъаладин майдандал елкадин патав кьиле фена.
“Чавай кьилин приздин — автомобилдин — гъалибчидихъ галаз алакъадиз экъечIиз хьанач. Машин акъатайди Садулаева Диана я, ада 9-нумрадин поликлиникада ковиддиз акси раб яна. Талукь тир къуллугърин куьмекдалди чна ам жагъурда ва савкьат агакьарда”, — лагьана мярекат кьиле тухвай У.Мукаиловади.
ЦIийи йисан вилик тешкилай и мярекатдин сергьятра аваз меркезэгьлийриз Аяз Бубадинни Живедин Ханумдин иштираквал авай итижлу нумраярни къалурна.
«Лезги газет»
