28-декабрдиз Дербент сагъламвилин рекьяй мумкинвилер сергьятламишнавай аялрин мурадар кьилиз акъудзавай Вирироссиядин “Ёлкадин мурадар” серенжемдик экечlна.
Ёлкадилай аялрин мурадар авай открыткаяр къачуник сифтени-сифте кьил кутурбурун арада шегьердин депутатрин собранидин председателдин везифаяр вахтуналди тамамарзавай Мегьамед Мегьамедов, депутатар тир Тельман Рагьимов, Велиюла Фаталиев, набут аялрин ва сагъламвилин рекьяй мумкинвилер сергьятламишнавай инсанрин месэлайрай шегьердин кьилин куьмекчи Жасмина Гьабибулаева ава.
ИкI, ачухай открыткайрай малум хьайивал, Тельман Самурхановазни Айша Халикьовадиз планшетар, Магьарам Хизриеваз велосипед, Амин Нурмегьамедоваз ракьарин конструктор къачудай мурадар ава.
Эвелдай Дербент шегьер Вирироссиядин серенжемдик экечlнавайдакай шегьердин кьил Рустамбег Пирмегьамедова малумарна. Санлай къачурла, шегьердин кьиле авайбуру, депутатри, меценатри ва майилвал авай агьалийри сагъламвилин рекьяй мумкинвилер сергьятламишнавай 43 аялдин мурадар кьилиз акъудда.
Къагьриман Ибрагьимов
