РД-дин Гьукуматдин Председатель Абдулпатагь Амирханов 27-декабрдиз республикадин карчийрин жемиятдихъ галаз гуьруьшмиш хьана. Ада мярекатдин иштиракчийриз чпик секинсузвал кутазвай месэлайрикай ачухдиз лугьун ва саналди герек серенжемар кьабулун патал веревирд авун истемишна.
Буйнакский райондай тир Эльмира Амирхановади вич эхиримжи 6 йисуз малдарвилел машгъул тирдакай, вичиз фермервилин майишат авайдакай, чил кирида кьунин къиметар йисалай-суз хкаж жезвайдакай ва и карда куьмек гуникай лагьана.
А.Амирханова и месэладиз талукь ведомствойрихъ галаз месэла веревирд ийидайдакай малумарна.
Мярекатдал жегьилрин арада карчивал вилик тухуникайни ихтилат фена. Карчи Марат Мутигулина “Хсуси карчивилел машгъул жезвайбуруз куьмек гун ва гъвечIи, юкьван карчивал” милли проект уьмуьрдиз кечирмишзавай гьалдикай хабар кьуна.
РД-дин карчивилин ва инвестицийрин рекьяй агентстводин регьбердин заместитель Мегьамед Абдулкъадирова ихтилат авурвал, милли проектдин сергьятра аваз 2021-йисуз хейлин серенжемар кьилиз акъудна. Карчийриз маркетингдай, регистрация авунай, теклифар гунай, контрактар кьабулунай ва маса рекьерай куьмекар гана.
Вичин нубатдай, Абдулпатагь Амирханова жегьил карчийриз Дагъустандин карчийрин агентстводихъ галаз санал мад са гуьруьш тешкилунин теклиф гана.
Дагъустандин медицинадин университетдин сад лагьай курсунин студент Даниял Шабанова Гъалибвилин йикъахъ ва Расул Гьамзатован юбилейдихъ галаз алакъалу яз “Лацу дурнаяр” тIвар алаз туриствилин цIийи маршрут ачухунин гьакъиндай лагьана.
Духтур Ума Абусуевади республикадин медицинадин хсуси центрайрин тIварунихъай РД-дин Гьукуматдин Председателдивай медицинадин хсуси идараяр 65 йисалай виниз алатнавай инсанриз медицинадинни яшайишдин рекьяй къуллугъар авунал желб авунин патахъай лагьана.
Гуьруьшдал республикада карчивал ва гьакI гъвечIи, юкьван бизнес вилик тухуниз талукь маса месэлаярни гьялна.
«Лезги газет»
