Чи ватанэгьлияр – гьар сана
Сир туш, Россияда алакьунар авай жегьилриз уьлкведин дережада еке фикир гузва. Шад жедай кар ам я хьи, Дагъустан Республикани и жигьетдай кьулухъ галамукьзавач. Дагъларин уьлкведа жегьилрин тереф хуьнин рекьяй жуьреба-жуьре проектар кардик кутазва, гьа жергедай яз чеб республикадилай къеце яшамиш жезвай жегьилар патални. Мисал яз, РД-дин жегьилрин ва динрин крарин рекьяй министерстводи РД-дин физический культурадин ва спортдин министерстводин, РФ-дин Президентдин патав гвай гьамишан векилханадин куьмекни галаз 18-35 йисан яшара авай дагъустанви жегьилар патал са шумуд хилекай ибарат премия тайинарна.
Ихтилат “Йисан жегьил алим” (духтур-алим) номинацияда винидихъ тIвар кьунвай премиядин лауреат хьайи Ирейхан Мегьамедовна Тажибовадикай я. Ам 1994-йисуз Ахцегьа дидедиз хьана. 2011-йисуз ада Ахцегьрин 2-нумрадин мектеб лап хъсан къиметралди куьтягьна.
2017-йисуз И Тажибовади “Сагъарунин кар” хиляй И.М.Сеченован тIварцIихъ галай Москвадин гьукуматдин медицинадин сад лагьай университет ва 2019-йисуз Б.В.Петровскийдин тIварцIихъ галай Россиядин хирургиядин илимдин центрада хирургвилин пешедай 2 йисан ординатура тафаватлудаказ куьтягьна.
Пешедин рекьяй махсус шагьадатнама къачурдалай кьулухъ ада 2020-йисалай Москвадин 62-нумрадин поликлиникада хирург яз кIвалахзава.
Ирейхан Тажибовади алай вахтунда Москвада академик Б.В.Петровскийдин тIварцIихъ галай Россиядин хирургиядин илимдин центрада аспирантурада кIелзава. КIвалахдин рекьяй тежрибани кIва-тIиз, гьа са вахтунда илимдални машгъул хьун ада вилик финин, пешекарвилин ерияр хкажунин жигьетдай важиблу яз гьисабзава.
Медицинадин илимдиз еке итиж ийизвай жегьил алим алай вахтунда вичин пешедиз талукь илимдин 16 кIвалахдин, 4 патентдин автор я.
2016-йисуз ам цIийивилериз куьмек гузвай фондуни тешкилнавай “УМНИК” программада гъалиб хьана. Ирейхан 2016-йисуз “Московский молодежный старт” конкурсдин финалдиз акъатна. Алатай вад-ругуд йисуз ада жегьил алимрин илимдинни тежрибадин гзаф конференцийра иштиракна. Здравоохраненидин хиляй 2021-йисуз ам “Россиядин регьберар” машгьур конкурсдин ярумчух финалдиз акъатунини алимдин бажарагъни чирвилер вини дережада авайвилин гьакъиндай шагьидвалзава.
Къуй чав ватанэгьлийрин агалкьунрикай хабарар гзаф агакьрай!
К.Ферзалиев
