Газдин кьилин турбайрилай участокдал кьван газдин хел тухунин месэла гьялун патал гила МФЦ-дин идарадикайни менфят къачуз жеда.
Малум тирвал, инсанар яшамиш жезвай, газдалди таъминарнавай чкайра агьалийрин участокдин часпардал кьван газ тухунин кIвалах гьукуматдин гьисабдай тамамарзава. Газдалди таъминарнавай хуьрерин агьалийри идалай вилик чпин кIвалерив кьван газдин турба хсуси такьатрихъ тухузвай. Амма вирибурухъ ахьтин мумкинвилер жезвачир. ИкI, хуьре тIебии газдин кьилин турба аваз, хейлинбур адакай менфят къачуникай магьрум жезвай, гьавиляй абуру пичера кIарасарни цIивинар, купIар кузвай. И месэла гьялун патал махсус программа арадал гъана. Гила и кар пулсуздаказ кьилиз акъудиз жезва. Хсусиятчиди сифте МФЦ-да газдин турбадихъ галкIурунин арза вугун лазим я. Амма и программа карчивилин рекье ваъ, жуван хсуси кIвал, хизан патал ишлемишзавай газдиз талукьди я.
Арза вугун патал лазим тир документрин патахъай МФЦ-дин пешекарривай хабар кьаз жеда.
«Лезги газет»
