И йикъара Москвада пауэрлифтингдай дуьньядин VII чемпионат кьиле фена. Ана дуьньядин 23 уьлкведай тир спортсменри чпин алакьунар ва устадвал къалурна. Абурун арада чи ватандашарни хьунал, абурукай кьве касдилай дуьньядин чемпионвилин тIвар къазанмишиз алакьунал чна дамахзава. ИкI, Асгьаб Тагъибегов штангар (троеборьедай 75 кг-дин заланвал авайбурун арада вири санлай 575 кг.) хкажуналди дуьньядин чемпионвилин тIварцIиз лайихлу хьана.
Чир хьайивал, А.Тагъибегов спортдин и жуьредал машгъул жез йисни зур я. Амма куьруьди тир и вахтунда ада вичихъ алакьунар авайди са шумудра субутна. ИкI, ада идалай вилик иштиракай Евразиядин ва Россиядин чемпионатра, Виридуьньядин мастервилин турнирдани 1-чкаяр кьуна. Ада тренер Ислам Рамазанован гъилик вичин устадвал мадни хкажзава.
Асгьаб Тагъибегован ери-бине СтIал Сулейманан райондин Кьасумхуьрелай я. Ам 1990-йисуз Дербентда дидедиз хьана, ана 14-нумрадин юкьван школада кIелна. ДГТУ акьалтIарнавай жегьилди алай вахтунда алишверишдин рекьяй зегьмет чIугвазва. Хизанда кьве велед чIехи ийизва.
* * *
Дуьньядин чемпионатда гъалибвал къазанмишнавай кьвед лагьай спортсмендин — Заур Абдурагьманован — ери-бинени СтIал Сулейманан райондин Алкьвадрилай я. Ам 1990-йисуз дидедиз хьана. Дуьньядин чемпионатда адани 75 кг-дин заланвал авайбурун арада вичин устадвал къалурна.
СтIал Сулейманан райондин спортдин, туризмдин ва жегьилрин крарин рекьяй комитетди (директор — Надир Эфендиев) хабар гузвайвал, З.Абдурагьманова дзюдодай ва самбодай спортшколада тренер-муаллим яз зегьмет чIугвазва. Гила адакай кьуд лагьай сеферда дуьньядин чемпион хьанва.
Рагнеда Рамалданова
