Дагъустан Республикадин Гьукуматдин Председатель Абдулпатагь Амирханова 21-декабрдиз Дербент шегьердин администрацияда совещание кьиле тухвана. Ада рикIел хкайвал, алай йисан апрелдин вацра Дербент шегьердиз Россиядин Федерациядин Гьукуматдин Председатель Михаил Мишустин атанай ва и вакъиадилай гуьгъуьниз федеральный гьукуматдин тапшуругъдалди Дербент шегьер 2025-йисалди комплекснидаказ вилик тухуниз талукь серенжемрин планни кьабулнай.
“Чун йисан эхирдал агакьнава ва къе уьмуьрдиз кечирмишнавай крарин нетижаярни кьуна кIанда, — лагьана Абдулпатагь Амирханова. — Вилик тухунин комплексный пландилай гъейри, Дербент шегьерда маса программаяр ва милли проектарни кьилиз акъудзава. Къе чна 60 чка авай аялрин бахча ишлемишиз вахкана. Ахьтинбур маса муниципалитетрани гзаф хьун лазим я. Гьелбетда, гъиле кьунвай вири крар тайинарнавай вахтара бегьемариз жезвач. Им сифте нубатда эцигзавай дараматриз талукь я. Гьукумдин органрин руководителри, эцигунардайбуру бязи вахтара тIугъвалдикай, эцигунардай материалар багьа хьуникай ва гьакI маса крарикай багьнаяр кьазва. Ихьтинбуралди эцигзавай дараматар гежел вегьин лазим туш. Гьар са чка вахтунда ва виниз тир еридивди эцигна кIанда. Школайра, бахчайра авай чи аялар шад жедайвал”, — лагьана А.Амирханова.
Дербент шегьер комплекснидаказ вилик тухуниз талукь серенжемрикай РД-дин экономикадин ва мулкар вилик тухунин министр Руслан Алиева малумат гана. Ада лагьайвал, федеральный ва республикадин бюджетрай ахъайзавай пуларалди комплексный пландик квай 54 серенжем кьиле тухудайвал я. Алиева са бязи объектрин проектар вахтунда гьазуруниз кьилин фикир гана кIанзавайди рикIел хкана. Абурун бинедаллаз гьукумдин федеральный органри герек кьадар пуларни чара ийида.
2023-йисан инвестицийрин программа туькIуьрун патал РФ-дин экономика вилик тухунин министерстводиз бюджетдин гьакъиндай кхьизвай арзаяр 2022-йисан 1-мартдалди агакьарун лазим я, — лагьана экономикадин министрди.
Совещанидал къейд авурвал, 2022-йисан федеральный бюджетдик 2023 ва 2024-йисара эцигун патал пуд объект кутунва: “Къайтагъ-Дербент водовод” (1 миллиардни 106 млн. манат), “Шурдере” водовод” (701,2 млн. манат), “804 аялди кIелдай юкьван школадин дарамат” (682,4 млн. манат).
Гъилевай йисуз Дербентда бюджетдилай къецяй тир чешмейрин гьисабдай мультимедийный фонтан эцигиз гъиле кьунва. 2022-йисалай шегьерда яшайишдин кIвалер, коммерциядин, культурадин ва маса дараматар эцигиз гатIунда, общественный мулкар аваданламишда.
И месэлайриз талукь яз Абдулпатагь Амирханова тади гьалда дараматар эцигдай чилерин гьакъиндай къайгъу чIугун, лазим документар вахтунда гьазурун, инвесторрихъ галаз тайин къарарар кьабулун лазим тирди къейдна.
РикIел хкин, РД-дин Кьил Сергей Меликова Дербент шегьер комплекснидаказ вилик тухунин госпрограмма уьмуьрдиз кечирмишунал гуьзчивалзавай куратор яз РД-дин Гьукуматдин Председатель Абдулпатагь Амирханов тайинарнавайди тир.
«Лезги газет»
