И йикъара чав Минск шегьердайни шад хабар агакьна. Ана пешекар спортсменрин арада AMC FIGHT NIGHT тешкилатди ММА-дай кьиле тухвай турнирда вичин ери-бине Мегьарамдхуьруьн райондин ЦIелегуьндилай тир Руслан Сатиева (56,7 кг-дин заланвал авайбурун арада) 3:0 гьисабдалди (бамишардай къайдадикай менфят къачуналди, бягьс вахт амаз акьалтIарна) гъалибвал къазанмишна. Гила пешекарвилин спортда ада галаз-галаз пуд сеферда гъалибвал къазанмишнава, пуд сефердани бягьс вахт амаз куьтягьнава…
Малум хьайивал, Р.Сатиев спортдал 5 йиса авай чIавалай инихъ машгъул жезва. Ам Дербентда дидедиз хьана, ана 9 класс акьалтIарна. Ахпа Москвадин ракьун рекьин колледждик экечIна.
Стхадихъ галаз санал абуру Москвада тренер Тимур Юсуфован гъилик устадвал хкажна. Хъсан нетижайрини чеб яргъалди гуьзетиз тунач. Ам пуд сеферда Россиядин чемпионвилин тIварцIин, дуьньядин чемпионатрин къизилдин ва буьруьнждин медалрин сагьибни я. Эхиримжи йисара ада вичин къуватар пешекар спортсменрин арада ахтармишзава. Аквазвайвал, инани адахъ агалкьунар ава.
«Лезги газет»
