Ихтиярар барабарбур я

Россиядин МИД-дин кьилин заместитель С.Рябкова къейд авурвал, США-дин вилик-кьилик квайбур Вашингтонни Москва барабар ихтиярар авай амадагар яз кьабулиз гьеле вердиш хьанвач. Ада США-диз и гьакъикъат аннамишуниз эвер гана. Идакай “Новости” РИА-ди хабар гузва.

Рябкован фикирдалди, и кар аннамишун США-дин хиве амукь­­завай буржи я. Россиядин терефдихъ галаз сада муькуьдаз­ ­гьуьр­мет авуналди суьгьбетар кьиле тухунин важиблувал Америкадиз хиве кьаз кIанзавач. Дипломатди малумарайвал, Лацу кIвал Кремлдихъ галаз анжах чпин терефдин шартIар вилик куту­налди ваъ, итижрин, ихтияррин барабарвилин бинедаллаз са мес­лятдал атун лазим я.

Китай акси я

Европадин ва Азиядинни Тихий океандин региондин уьлквейра Америкадин ракетаяр эцигуниз Китайдин МИД-ди аксивал къалурзава. Идакай “Новости” РИА-ди хабар гана.

“США-ди ракетаяр эцигуниз чна кьетIивилелди наразивал къалурзава. Китайдин мулкарилай къерехда чна садрани ядерный яракьар эцигнач”, — лагьанва малуматда. Китайдин гьукумдарри  къейднавайвал, чпин уьлкве оборонадин военный стратегиядал ра­зи я ва чпи сифте кьил кутуналди ядерный яракьар ишлемишдач­.

Сириядин гьалар веревирдна

21-декабрдиз Нур-Султанда Сириядин гьалар къайдадик кутунин рекьяй РФ-дин махсус векил А.Лаврентьева Туьркиядин терефдихъ галаз Сириядин битаввал хуьнин месэла веревирдна, хабар гузва “Новости” РИА-ди.

Векилдин гафаралди, вири терефриз Сириядин гьалар пайгар­дик ахкатна кIанзава, гьавиляй “астанинский” гьерекатдин уьлквеяр (РФ, Иран, Туьркия) Сириядин мулкарин битаввиликай рахазва.­

“Чаз аквазвайвал, четинвилер ава, абур алудна кIанда”, — ла­гьана Лаврентьева. Россиядин ам кьиле авай делегацияди Сириядинни Ирандин векилрихъ галазни суьгьбетар кьиле тухвана. Ирандин делегациядин кьил А.Асгар Гьажиди гуьгъуьнлай малумарайвал, Сириядин гьалар хъсанарунин жигьетдай Москвадинни Тегерандин фикирар мукьва я.

Сирияда къалмакъал 2011-йисалай давам жезва. Алай вахтунда эвелимжи фикир сиясатдин рекьяй къайдадик кухтунин, Сирия гуьнгуьна хтунин, гьакIни катайбур элкъуьрна хкунин месэлайриз гузва. Къизгъин гьалар иллаки Сириядин Идлиб вилаятда арадал къвезва, анин са кьадар паяр бандитрин кIеретIрин ихтиярда ава.

ТIугъвалдин “муг” малум туш

Коронавирус гьинай пайда хьайиди ятIа тестикьардай хьтин якъин делилар ВОЗ-диз гьеле малум туш. Ихьтин фикир Виридуьньядин здравоохраненидин тешкилатдин векил М.Райана малумарна, хабар гузва “Новости” РИА-ди.

“Вирус пайда хьайи чка чир хьун чун патал важиблу я, амма им акьалтIай важиблувал туш”, — лагьана ада. Адан гафаралди, вирус туьретмиш хьунин рекьяй тухузвай ахтармишунар давам жезва, амма и кар яргъалди кьиле фин мумкин я. Гьавиляй тади гьалдин нетижаяр вилив хуьник умуд кутаз жедач.

Ковид акатайбурун кьадар виридалайни гзаф США-да ава. Адан гуьгъуьнал Индия, Бразилия, Франция, Россия, Испания, Аргентина, Великобритания, Колумбия, Италия ала.

Жерме авунин шартI малумарна

Госдумадин депутат С.Леонован фикирдалди, эгер коронавирусдин тIугъвалдин гьалар лап къизгъинбур хьайитIа, рапар ягъуникай кьил къакъудзавайбур жерме авунин къанун кардик акатун мумкин я. Идакай “Говорит Москва” чешмеди хабар гана.

Леонован гафаралди, гьелелиг жерме кардик кутунин чарасузвал авач, гьикI хьи, гьалар гуьзчивилик ква, амма Россиядин гьукумдарри и барадай къецепатан уьлквейрин тежриба фикирда кьун лазим я.

“Ширин къенфетар гуналди чавай азар сагъариз жедач… Лап чIуру гьалар арадал атайтIа, Европадин уьлквейра хьиз, чинани вакцинадин рапар ягъун чарасуз серенжем хьиз малумарда ва адакай къерех хьайибур жерме ийида”, — лагьана депутатди.

Россиядин оперштабдин делилралди, уьлкведа умуми имму­нитет 58 процентдив агакьнава. Вакцинадин кьве компонентдин ра­пар янавайбурун кьадар 70 миллионни 8 виш агъзурдалай алатнава.

Ратар патал хийирлу няметар

Пегьризчи Лора Алидин фикирдалди, пахлаяр ва кул-кусрал жедай гъвечIи емишар тIуьниз ишлемишуни ратарин сагъламвилиз хийир гуда. Пешекардин гафар “Лента.ру” сайтди раижнава.

Ада гъавурдик кутурвал, пахла тIуьр ем иливаруниз хъсан па­тахъай таъсирзавай затI я. Идахъ галаз сад хьиз, ада С ви­та­минралдини антиоксидантралди девлетлу емишарни теклифзава­.

Гьа са вахтунда ички гзаф ишлемишуникди ратарин сагъламвилиз зиян гузвайдакайни пешекарди рикIел хкана. Идалай вилик пегьризчи С.Фуса къен кIеви хьайи чIавуз  ратарин кIвалах гуьнгуьна хтун патал инжил тIуьн теклифнай.

«Лезги газет»