18-декабрдиз залан азардик (коронавирусдик) Дагъустан Республикадин сиясатдинни жемиятдин машгьур векил, уьмуьрдин чIехи тежриба, къени къилихар авай инсан, вичин кIвалахдин гъавурда хъсандиз авай пешекар Мурадхан Хидирович Хидиров чи арадай акъатна.
М.Х.Хидиров 1962-йисан 14-апрелдиз Мегьарамдхуьре дидедиз хьана. 1984-йисуз ДГУ-дин экономикадин факультет акьалтIарна. КIвалахдив эгечIай сифте йикъарилай гатIунна, М.Х.Хидирова вич кар алакьдай, алакьунар авай пешекар яз къалурна. 1992-йисуз ам РД-дин эменнидин рекьяй Государстводин комитетдин председателдин заместителвиле тайинарна.
Пешекарвилин ва уьмуьрдин тежриба, тешкилатчивал республикадин гьукумдин органра еке къимет гузвай ерийрикай тир. Гьа ихьтин ерийри М.Х.Хидироваз яваш-яваш кIвалахдин рекье виликди фидай шегьреяр ачухна. 1998-йисалай ада РД-дин Госимуществодин министрдин заместителдин, 2003-йисалай РД-дин эменнидин алакъайрин министрдин сад лагьай заместителдин везифаяр кьиле тухвана.
2010-йисан июндиз М.Х.Хидиров Махачкъаладин гьуьлуьн алишверишдин портунин генеральный директордин заместителвиле тайинарна. 2016-йисан декабрдилай портунин регьбердин везифаяр М.Х.Хидирован хиве гьатна. И къуллугъдал ада вич чранвай пешекар тирди нубатдин сеферда тестикьар хъувуна. Адан алахъунрин нетижада республикадин транспортдин инфраструктурадин стратегиядин метлеб авай объектдин кIвалах вилик фена, цIийи кукIушрив агакьна.
М.Х.Хидирова Дагъларин уьлкведин жемиятдин уьмуьрдани активнидаказ иштиракзавай, ам са шумуд сеферда РД-дин Халкьдин Собранидин депутатвиле хкяна.
Гьина кIвалахнатIани, ада еке гьуьрмет, авторитет къазанмишна. Сифте нубатда, — вичин къени къилихралди, чIехи ватанпересвилелди. Ам хайи республикадихъ рикI кузвай кьегьал хва, бажарагълу регьбер, къастунал кIеви инсан, гафунин сагьиб тир. Адан гьакъисагъ зегьмет государстводин ва ведомствойрин шабагьралди къейднава.
Мурадхан Хидирович санал кIвалахай юлдашар патал герек чIавуз вичик умуд кутаз жедай кIеви дуст тир. Адан экуь къамат ам чидайбурун рикIера гьамишалугъ амукьда.
Меликов С.А., Аскендеров З.А., Амирханов А.Г., Гьасанов А.П.,
Мегьамедов М.Б., Левицкий Ю.А., Омаров Н.М., Эмеев Б.Э.,
Агьмедов С.С., Давдиев К.М., Абдулмуслимов А.М.,
Жафаров Р.Ж., Къазиев М.Н., Мажонц М.Л.,
Телякавов М.П., Мирошкин С.Д., Дадаев С.К., Агьмедов Ф.З.
***
Мурадхан Хидирович Хидиров амач лагьай хабарди чун вири къарсурна: залум коронавирусди чи арадай рикIе экуь къастар амай, вилик гзаф крар кумай лезги халкьдин кьегьал рухвайрикай сад акъудна.
М.Х.Хидиров хайи чIалахъ, чилихъ, халкьдихъ рикI кайи чIехи ватанпересрикай тир. “Лезги газетдихъ” галаз ада хейлин йисара сих алакъаяр хуьзвай: гьар йисуз подпискадиз пулдин такьатар чара ийизвай, жуьреба-жуьре маса рекьерайни редакциядиз куьмекар гузвай.
М.Х.Хидиров чидай гьар са касди ам пара жумарт, чарадан дердиникай хабар кьадай, игьтияж авайдаз куьмекдай инсан хьиз рикIел хкизва. Чи рикIерани ам гьахьтинди яз амукьда.
“Лезги газетдин” редакциядин коллективди Мурадхан Хидирович Хидиров рагьметдиз финихъ галаз алакъалу яз адан хизанриз, вири мукьва-кьилийриз, дериндай хажалат чIугуналди, башсагълугъвал гузва. Аллагьди рагьметрай вичиз!
***
Са акьван яргъалди давам тахьай залан азардик Махачкъаладин гьуьлуьн алишверишдин портунин генеральный директор Мурадхан Хидирович Хидирован рикI акъваз хьана. Чешнелу хизандин кьил, вичихъ галаз санал кIвалахай юлдашрив къайгъударвилелди эгечIай регьбер, бажарагълу тешкилатчи уьмуьрдай хъфена. Вичин вири уьмуьр жемиятдиз къуллугъ авуниз бахш авур инсан чи арада амач.
М.Х.Хидирован гуьзчивилик кваз миллиардрив агакьна буржар алаз хьайи порт республикада кIвенкIвечи жергейра авай карханайрикай садаз элкъвена. Ана зегьмет чIугвазвай къуллугъчийрин агьваллувал лагьайтIа, хкаж хьана. Гьавиляй адаз коллективдин арада еке гьуьрмет авай.
Махачкъаладин гьуьлуьн алишверишдин портунин коллективди Мурадхан Хидирович Хидиров вахтсуз кечмиш хьунихъ галаз алакъалу яз адан мукьва-кьилийриз, вири багърийриз, дериндай хажалат чIугуналди, башсагълугъвал гузва. Къени инсандин экуь къамат чи рикIерай акъатдач. Адан тIвар республикадин портунин тарихда эбеди я.
«Лезги газет»
