Медицинадин страхованидин чарасуз полис (ОМС) гила рекъемрин жуьреда жеда. Аял хьайила ва я Россиядин гражданство къачурла, рекъемрин полис са чар-цIарни галачиз гьазурда. Къейдзавайвал, полисдин цIийи жуьре 2022-йисуз пайда жеда. ИкI, медицинадин рекьяй куьмек герек хьайила, жув вуж ятIа чирзавай документ (паспорт) къалурун бес жеда. Идакай РФ-дин здравоохраненидин министр М.Мурашкоди малумарна.
Адан фикирдалди, рекъемрин полис кардик кутуникди медицинадин идарайриз физвайбурун кар фад-фад ва къулайдаказ туькIуьда. “Им мад са цIийивал я… 2022-йисалай уьлкведин агьалийривай чарчин полис герек амачирди яз гьисабайтIа жеда”, — лагьана министрди.
Къейдзавайвал, ОМС-дин полис арадал гъун патал Госкъуллугърин порталдин куьмекдалди электронный къайдада арза кхьиз жедай мумкинвал ава.
«Лезги газет»
