Эхиримжи вахтара гзафбурун сиверай ван къвезва: киберспорт. Вучиз и къугъунай миллионралди пулар гузва? Вахтар дегиш жердавай цIийи пешеяр, цIийи мумкинвилерни арадал къвезва. Компьютердин къугъунар машгьур хьуни цIийи пешени арадал гъана.  Адаз киберспорт лугьузва. Къугъунрин индустрия йигин еришралди вилик физва, аялрин хьиз, чIехибурун фикирни  желбзава. Себеб?  Пул атун.

Россиядин Team Spirit команда (адак дагъустанви Мегьамед Халитовни квай) международный акъажунрин Dota 2 къу­гъуна гъалиб хьайидалай кьулухъ ком­пью­тердин къугъунрал фикир желб хьун садлагьана артух хьана. Гъалиб хьайибурун приздин фонд 18,2 миллион доллардиз барабар тир. Идани неинки Россияда, гьакI Дагъустандани цIийи машгъулат вилик ­фи­низ рум гана. Киберспорт Олимпиададин къугъунрик кутунин месэлани къара­гъарна­.

Киберспортдин къурулуш регьятди я: къугъунар туькIуьрзавайбуру турнирар тешкилзава, анра иштиракзавайбуру пул къазанмишун (ам командадик квай вирибуруз  пайзава) патал къугъвазва.

Гьелбетда, гьар са карди, цIийи пешеди гзаф вахт, къуватар ва къастунал кIеви­вал истемишзава, гьатта — компьютердал къугъунар яз хьайитIани. Къугъунрал­ машгъул чIехи пай ксари анжах экономикадиз талукь паюниз итижзава. Амма вири уьмуьр пул къазанмишун патал видео­къу­гъунриз бахш авун герек къведач.

Киберспорт — им адетдин пеше туш. Ада хъсан гьазурлухвал истемишзава, интел­ле­кт­­, кьатIунар, къастунал кIевивал хьтин ерияр еримлу ийизва. Гележегда и пеше гьикI вилик фидатIа, лугьуз жедач. И кар акьалтзавай несилдилай аслу тирди  ­якъин я.

Самур  Азимов,

журналистикадин отделенидин

3-курсунин студент