РФ-дин просвещенидин министерстводи кIелунин 2021/2022-йисуз мектебра кIелзавай аялрин Вирироссиядин олимпиададин эхиримжи пай тухудай вахт ва чкаяр тайинарнава.
ИкI, мектебра кIелзавай аялрин Вирироссиядин олимпиададин эхиримжи пай са шумуд регионда санлай 18-мартдиз башламиш жеда. Аялри мектебра тарсар гузвай 24 предметдай чпин чирвилер раижда. Чирвилерин дережа ахтармишдай акъажунар френг чIалалай ва химиядилай башламиш жеда. Ингилис чIалай, биологиядай ва технологиядай акъажунар эхиримжи йикъара, яни 25-30-апрелдиз кьиле фида.
Мектебра кIелзавай аялрин Вирироссиядин олимпиадади жегьилриз вузрик имтигьанар галачиз экечIунин лап хъсан мумкинвал ачухзава. Ам кьуд паюникай ибарат я: школадин, муниципалитетдин, региондин ва эхиримжи пай. ВсОШ-дин кьуд йисан вахтунда къуватда жедай дипломри олимпиада кьиле тухвай предметдиз талукь хиляй (пешедай) Россиядин гьи вуздик хьайитIани имтигьанар галачиз экечIдай ихтияр гузва.
«Лезги газет»
