“Сад тир Россия” партиядин 20 йисан юбилейдин декададин сергьятра аваз Дербент райондин кьил Мавсум Рагьимов ЛукIарин хуьруьз фенвай. Малум хьайивал, важиблу месэлаяр веревирд ийиз райондин кьилиз аниз атун и хуьруьн агьалияр тир Мирзе Мегьамедова ва Идрис Расулова теклифнавай.
Мавсум Рагьимов ва Лукlарин хуьруьн кьил Арсен Шихалиев, хуьруьн активдихъ галаз, республикадин инвестицийрин программадин сергьятра аваз, 2022-йисуз 60 касдиз чкаяр жедай аялрин бахча эцигиз гатlунзавай чкадиз килигна. Инлай абур муниципальный рекьерин фондунин харжаралди аваданламишзавай Школадин куьчедиз фена.
Ахпа агьалийрин сагъламвилиз къуллугъзавай идарадиз килигна. Райондин кьили ана кlвалахзавай къуллугъчийрин зегьмет къейдна. Мавсум Рагьимова, “Здравоохранение” милли проектдин сергьятра аваз, Лукlарик алай аямдин истемишунрив кьазвай медпунт эцигдай план авайдакай, лазим документар гьазурзавайдакай малумарна. Цlийи медпункт агьалийриз пландин ва тади гьалдин куьмек гун лазим тадаракралди тагьминарда.
Инлай абур аялар школадиз физ-хквезвай куьчедиз килигна. Куьчедин са пай татугай гьалда авай. Ам 2022-йисуз ремонтунин пландик кутадайвал я.
2001-йисуз эцигнавай школада аялриз чими хуьрекар гузвай пищеблокдиз, спортзалдиз, “Точки роста” кабинетриз килигна. Райондин кьили школадин директор Айнудин Османован гьакъисагъ зегьмет къейдна.
Эхирдай М.Рагьимова хуьруьн кlвалахра активдаказ иштиракзавай Мирзе Мегьамедоваз ва Идрис Расуловаз сагърай лагьана.
Къагьриман Ибрагьимов
