Гьукуматди хуьрерин ипотекадиз субсидияр чара авун ва хуьруьн майишатдин хилез куьмек гун патал такьатар чара авунва. Тахминан 790 миллион манат “Хуьруьн ипотека” программадиз серфда. Адан куьмекдалди агьалийривай йиса винел анжах 3 % кьил къвезвай кьезил ставкадалди чил, цIийи дараматрай квартира, гьазуран кьилдин кIвал маса къачун ва я авай чилел кIвал эцигун патал кредит къачуз жеда. Программа хуьрерин чкайриз ва агьалийрин кьадар 30 агъзур касдилай гзаф тушир шегьерриз талукь я.
2021-йисуз хуьруьн ипотекадин куьмекдалди чпин яшайишдин шартIар 50 агъзур хизанди хъсанарна. Алава финансар чара авунин игьтияж Россиядин Банкунин асул ставкадин кьадар йиса 4,25 процентдилай 7,25 процентдал кьван хкаж хьунихъ галаз алакъалу я.
Гьукуматди гьакIни хуьруьн майишатдин карханайриз финансрин куьмек гун давамарзава. 10,5 миллиард манат малариз алаф маса къачуниз ва хуьниз хьанвай харжийрин тайин кьадар эвез хъувуниз харжда. Къарар кьабулун ихьтин алафрин къиметар хкаж хьунихъ галаз алакъалу я. Ада хиле арадал атанвай гьалар гуьнгуьна хутаз, маларин ва гьасилзавай некIединни адакай ийизвай суьрсетрин кьадар хуьз куьмекда.
Такьатрин амай пай — 5,6 миллиард манат — хуьруьн майишатдин суьрсет гьасилзавайбуру агропромышленный цIийи объектар арадал гъуниз ва авайбур алай аямдин истемишунрив кьадайвал туькIуьруниз ийизвай харжийрин тайин пай эвез хъувуниз серфда. Пулдин такьатри абуруз некIедин фермаяр, емишар ва майваяр хуьдай чIехи гьамбарханаяр, селекциядинни тумчивилин центраяр ва са жерге маса объектар кардик кутаз куьмекда. Санлай къачурла, вири и серенжемри хуьруьн майишат еримлу авунин кардик пай кутада, хабар гузва РД-дин экономикадин ва мулкар виликди тухунин министерстводи.
«Лезги газет»
