26-ноябрдилай 3-декабрдалди Румыниядин меркез Бухарест шегьерда армрестлингдай дуьньядин чемпионат ва 21 йисал къведалди яшара авай жегьилрин арада кIвенкIвечивал патал акъажунар кьиле фена. Ана 44 уьлкведай тир 1600-дав агакьна спортсменри чпин гъилерин гьунарар къалурна. Абурун арада чи ватанэгьлиярни ава.
СтIал Сулейманан райондин спортдин, туризмдин ва жегьилрин крарин рекьяй комитетдин кьил Надир Эфендиева хабар гайивал, и акъажунра иштиракай Равил Тагьирбегов (60 кг-дал къведалди заланвал авайбурун арада) — 1 ва Аким Гьамзатов (55 кг-дал къведалди заланвал авай жегьилрин арада) 2-чкайриз лайихлу хьана. Абуру армрестлингдай дуьньядин ва Европадин чемпион, РФ-дин лайихлу тренер Малик Тагьирбегован гъилик вердишвилер къачузва, чпин устадвал мадни хкажзава.
Бубадин гелеваз физвай Равилахъ агалкьунар идалай виликни хьана. ИкI, алай йисан мартдиз Орёл шегьерда жаванрин арада кьиле фейи Россиядин кIвенкIвечивал патал акъажунра ада гьам эрчIи ва гьамни чапла гъилелди къизилдин медалар къазанмишна.
Рагнеда Рамалданова
