Хци месэла

Докъузпара райондин Миграгърин хуьруьн администрациядик акатзавай “Там” участокда яшамиш жезвай агьалийри “Лезги газетдин” соцсетра авай официальный чинриз чар ракъурнавай.

ТIвар кьунвай участокдин агьалияр хуьруьвай хейлин яргъа яшамиш жезвайвиляй абур бязи мумкинвилерикайни къулайвилерикай магьрум я. Кагъазда асул гьисабдай са месэладикай ихтилатнава — “Там” участокдай Къалажухрин хуьруьхъ  фидай рекье гьалтзавай кIамал муьгъ эцигун. Агьалийри газетдин чинилай чпин месэла къарагъарун тIалабнава.

Чарче къейднавайвал, ана яшамиш жезвай агьалийриз чпин аялар Къалажухрин мектебдиз ракъурун гзаф четин жезва.

Ингье вуч кхьенватIа: “Чуьлдай пуд километрдин мензил атIана, кIамалай элячIна, Къалажухрин мек­тебдиз (виридалайни мукьвал алай мектеб я — К.Ф.) фин регьят кар туш. Хатасузвилин месэлани ава: рекье вагьши гьайванар (жанавурар, чакъалар…) дуьшуьш хьунни мумкин я. Рекье гьалтзавай кIамал улакьар фидай муьгъ эцигунин патахъай чна талукь министерствойриз, депутатриз, райондин кьиле авайбуруз идалай виликни кагъазар кхьена. Амма месэла къени гьялнавач. Дуьз рехъ, кIамал муьгъ тахьайла, начагъ хьайи касдин патав “Тади куьмек” гьикI агакьда? Жуван сала, багъда гьасилай затIар маса гун патал масанихъ тухудайлани, кIеве гьатзава. Къати марфар къунин нетижада кIамуз селлер атайла, анаг къайдадик кухтадалди, агьалийривай чеб авай чкадай улакьра аваз масанихъ физ жезвач…”

Шак алачиз, неинки мектебдихъ, гьакI хуьруьн майишатдихъ, агьалийрин гьал-агьвалдихъ галаз алакъалу месэла я. Хуьруьн майи­шатдал машгъул агьалияр, кIамун а пата авай чкайрай векьер ва  маса затIар хкидайла, я а патаз тухудайла, четинвилерал ацалтзава. Ла­гьа­на кIанда хьи, и четинвал накьни къе арадал атанвайди туш.

Агьалийри къарагъарнавай мес­эла гьялунин барадай вуч авун фикирдиз къачунватIа чирун патал чна Докъузпара райондин администрациядивай баянар гун тIа­лаб­нава, амма гьеле жаваб агакьнавач.

Чна умуд кутазвайвал, “Там” участокда яшамиш жезвай агьалийрин месэла гьялуник РД-дин транспортдин ва рекьерин майишатдин министерстводини кьил кутада. Агьалийрин мурад кьилиз акъатун патал алахъунар авун чнани давамарда.

Куругъли Ферзалиев