Докъузпара райондин информациядин сад тир центради хабар гузвайвал, газламишунин программадин сергьятра аваз, Къаракуьре хуьруьз газ гъидай турба тухунин кIвалахар гъиле кьунва. Газдин турба ЦIийи Къаракуьре хуьряй гъидайвал я. Адан яргъивал 1800 метрдиз барабар жеда.
Эцигунринни монтаждин кIвалахрин заказчик РД-дин “Спецгазстройсервис” ГКУ я. Проект РФ-дин регионар газламишунин программадин сергьятра аваз кьилиз акъудзава. Газ хуьруьв агакьардай турба туькIуьрунин ва чкадал тайинарунин кIвалахриз республикадин бюджетдай 3 миллионни 859 агъзур манат чара авунва.
Алай вахтунда кIвалахар кьиле физвай чкадал газдин турбадин кIаник жедай даяхар туькIуьрун патал фурар эгъуьнзава. Ихьтин даяхар хуьруьв газ агакьардай турба чIугвадай вири мензилда гьар 6 метрдилай эцигда. Газдин асул турбадин диаметрди 89 мм тешкилзава. КIвалахар кьиле физвай чкадал алай вахтунда кавча галай тракторди кIвалахзава. Проектдин бинедаллаз, гьавадин шартIар хъсанбур хьайитIа, эцигунардайбуру лазим вири кIвалахар алай йисан эхирдалди кьилиз акъудун фикирдиз къачунва. КIвалер кIарасралди, цIивиндалди чими ийизвай къаракуьревийрин 117 кIвал (тахминан 1000 кас) 2022-йисуз газдалди таъминардайвал я.
«Лезги газет»
