ЦIаяр кьуникай къутармишдай машинрин шоферар неинки гьамиша куьмек гуз гьазур я, гьакl абуру чпин машинарни герек чкадиз тади гьалда физ жедайвал къайдадик кваз хуьзва. Бедбахтвилин дуьшуьшрин вилик пад кьаз, цlай хкадариз, техника гьамиша герек я. Гьам аварийрикай къутармишиз, цlай хкадардай яд ва махсус каф агакьариз. Вири и везифаяр шоферрин хиве ава.
Азиз Рамазанов пожарный частуна шофер яз 10 йис я. Ада вичин везифаяр гьакъисагъвилелди кьиле тухузва. Россиядин ГУ МЧС-дин Дагъустанда авай 5-нумрадин ПЧС-да цIаяр кьуникай къутармишдай кьве машин ава. Абур гьамиша гьазур я. Герек атайла, кьведни кардив эгечlзава. Са ЧП хьана лагьана хабар атайла, 30 секунддилай къутармишзавайбур чкадилай юзана кlанзава. Техника гьамиша къайдада хьун шофердин хиве ава.
А.Рамазанов 1968-йисан 12-декабрдиз Къарабудахкент райондин Манас хуьре рабочий Шамсудинан хизанда дидедиз хьана. Кьурагьа яшамиш жезвай Шамсудинан хизан, 1966-йисан залзала себеб яз, Манасдиз куьч хьанвай. Ахпа Даркlушрал хтана, кlвалер эцигна. Ана 8 класс акьалтlарай Азиза, Дербентдин ракьун рекьерин ГПТУ-да рекьер ремонтдайбурун бригадирвилин пешедай чирвилер къачузва. Анаг акьалтlарай жегьил, кlвалахдин тежриба къачуз, Ростов шегьердиз ракъурзава. Анай ам 1987-йисуз Советрин Армиядин жергейриз тухузва. 1989-йисуз, Ватандин вилик пак тир буржи кьилиз акъудна хтана, ада вад йисуз Ростовдин ракьун рекьерал вичин пешедай кlвалах давамарна. 1995-йисуз ам хуьруьз хквезва, арендада кьунвай чилел зегьмет чlугвазва. 2011-йисалай къенин йикъалди ам пожарный частуна шофер-къутармишдайди я.
— Азиз стха, вуна ви кlвалахдин кьетlенвилерикай вуч лугьуда? — хабар кьуна за.
— Пожарный машиндал кlва-лахзавай шофердин зегьмет регьятбурукай туш. Гзаф дикъет ва жавабдарвал герек я. Тежриба авачир шофер ихьтин къуллугъдал ерли кьабулдач. Са хатадикай хабар гузвай сигнал атайла йиф-югъ талгьана, гьи вахтунда хьайитlани, пожарный машин командани галаз цlай кьунвай чкадал гьасятда физ гьазур хьун лазим я. Техникани гьамиша женгиниз физвайди хьиз, къайдада аваз хьана кlанда. Марф, жив къваз, рехъ муркlади кьунваз, чилин циф аваз хьайитlани, за команда вахтунда чкадал агакьарун лазим я. Цlай хкадардай яд ахъаюнин везифаярни шофердин хиве ава. Генани шофердиз, махсус духтурар къведалди, хасаратвал хьанвайбуруз медицинадин сифте куьмек гузни чир хьана кlанзава. Къутармишун чи буржи я.
2012-йисуз Дербент шегьер селдин хура гьатайла, Дагъустандин МЧС-дин къуллугъчийри ана, игитри хьиз, йиф-югъ талгьана, зегьмет чIугуна. Абурухъ галаз ана гьакъисагъвилелди кlвалахай Азиз Рамазанован зегьмет Россиядин МЧС-дин “За отличие в ликвидации последствий чрезвычайной ситуации” медаль гуналди къейдна.
2015-йисуз, са йифен кьулариз, Музаим хуьруьн администрациядин дарамат цlай кьуна кузва лагьана хабар атайла, Азиз Рамазанов, командани галаз и хуьруьз рекье гьатна. Хуьруьв агакьдайла, абуруз дарамат кузвайди акуна. Анив агакьиз са 200 метр амаз, абурун пожарный машиндиз кьве автоматчикди гуьлле гуз башламишна. Амма Азиз Рамазанов вич-вичикай квахьнач. Эрчlи патахъай гузвай гуьллейрикай вичихъ галай кьуд юлдаш ва вич къутармишун патал ада, кьил агъузна, машин чапла патахъ элкъуьрна. Машин акъвазарна. Кьил хкажна килигайла, рекьивай са виш метр яргъа хьиз, машин чуьлдиз акъатнавай. Анай эвичlайла, командирдихъ, са пожарныйдихъ ва адахъ вичихъни гуьллеяр галукьнавайди чир хьана. Хьанвай хиреризни килиг тавуна, абуру гьасятда талукь органриз чпин кьилел атай дуьшуьшдикай хабар гана. Аллагьдиз шукур, гена садални уьмуьрдиз хаталу хирер хьанвачир.
Вич-вичикай квахь тавуна, галай юлдашарни, машинни бедбахтвиликай хуьнин карда къалурай кьегьалвиляй 2016-йисуз Россиядин Президентдин патай Азиз Рамазановаз “За спасение погибавших” медаль гана.
Пожарный машинрин шоферар амай шоферрилай са кlарцlин вине ава, абурукай гьар сад чпин кlвалах хъсандиз чизвай пешекарар я.
А.Рамазанован туькlвей хизанда кьве велед ава. Чи мурад Азиз стхадихъ сагъламвал, саламатвал, мадни агалкьунар хьун я.
Къагьриман Ибрагьимов
