Чи ватанэгьлияр — гьар сана
Чахъ военный рекьяйни жавабдар къуллугъар тамамарай, вини дережайриз, генералдин чIехи тIварариз лайихлу хьайи, чпин крарилайни алакьунрилай гьар са лезгидивай чешне къачуз жедай хьтин ватанэгьлияр тIимил авач. Алай йисан 5-декабрдиз вичин 70 йисан баркаллу юбилей къейд авур генерал-майор Тагьир Хийирович Эминовни гьахьтинбурун жергедай я.
Ам 1951-йисан 5-декабрдиз Кьасумхуьруьн райондин Агъа Арагърин хуьре дидедиз хьана. 1969-йисуз Кьасумхуьруьн юкьван мектеб акьалтIарна, жегьилзамаз аскервилиз майилвал къалурай Тагьир Эминов гьа йисуз СССР-дин МВД-дин Харьковдин военный училищедик экечIна. КIелна куьтягьай 1973-йисалай Тагьир Эминова вичин офицервилин къуллугъ башламишна.
1982-йисуз ада далу патан ва автотранспортдин военный академиядин автомобильный факультет, 1994-йисуз В.И.Ленинан тIварцIихъ галай военно-политический академиядин юридический факультет, 1998-йисуз РФ-дин яракьлу къуватрин военный академияда кьилин курсар агалкьунралди куьтягьна.
ВикIегь офицерди Россиядин МВД-дин къенепатан кьушунра (ВВ) жуьреба-жуьре къуллугърал зегьмет чIугуна. Герек тир чирвилер ва алакьунарни дирибашвал авайвиляй ам къуллугъдин гурарай вини дережайриз хкаж хьана. И карди адахъ хъсан чирвилер, алакьунар, жуьрэтлувал авайвилин гьакъиндай шагьидвалзава. Взводдин командирвилелай башламишай къуллугъ гьакъисагъвилелди тамамаруникди адал Россиядин МВД-дин къенепатан кьушунрин Москвадин округдин кьушунрин командующийдин заместителдин жавабдар къуллугъ ихтибарна. 1998-йисалай ада Россиядин МВД-дин кьилин командованида, гьакIни ла-йихлу пенсиядиз фидалди, генерал-майордин чинда аваз, МВД-дин къенепатан кьушунрин автобронетанковый управленидин начальниквиле кIвалахна.
Т.Эминов “РФ-дин транспортдин лайихлу къуллугъчи”, “РФ-дин МВД-дин гьуьрметлу къуллугъчи” лагьай тIварарин сагьиб я. Адан гьакъисагъвал “Военный лайихлувилерай” ордендалди, тIвар кхьенвай сятиналди, жуьреба-жуьре 8 медалдалди къейднава.
Тагьир Хийировича Дагълух Къарабахда хьайи къалмакъал секинарунин, 1986-йисуз Чернобылдин атомдин электростанцияда хьайи мусибатдин нетижаяр арадай акъудунин, 1995-йисалай Чечен республикада къанунсуздаказ яракьламиш хьайи бандитрин кIеретIрихъ галаз женг тухунин гьерекатрани дирибашвилелди иштиракна.
1999-йисан августдилай ада Дагъустанда, гуьгъуьнлай техникадинни яракьрин рекьяй Россиядин МВД-дин умуми дестедин командующийдин заместителдин къуллугъдал алаз Чечен республикада террористриз акси женгера активвилелди иштиракна. Гьина хьанатIани, санал къуллугъзавайбурун арада ам гьамиша нуфузлу хьана.
2007-йисан 14-июндиз РФ-дин яракьлу къуватрин общевойсковой академиядин диссертацийрин советдин къарардалди Тагьир Хийировичаз военный илимрин кандидатвилин дережа гана. 2008-йисан декабрдиз ам военный илимрин академиядин профессорвиле хкяна.
2011-йисуз военный къуллугъдилай элячIайдалай кьулухъ техникадинни яракьрин жигьетдай ВВ-дин кьилин командующийдин меслятчивиле, 2015-2018-йисара спортдин “Динамо” обществода кIвалахна. Алай вахтунда Москвада яшамиш жезва.
Тагьир Эминова ватандихъ, багърийрихъ галаз датIана сих алакъаяр хуьзва, гьар йисуз са шумудра Дагъустандиз хквезва. Уьмуьрдин юлдаш, муаллим Назият Къарахановнадихъ галаз санал кьве хва тербияламишнава. ГъвечIи хци бубадин рехъ давамарзава: подполковникдин чинда аваз, Чечняда Росгвардияда къуллугъзава.
70 йисан юбилей мубаракунихъ галаз сад яз, чна генерал-майордиз чандин сагъвал, руьгьдин кIубанвал хьун алхишзава.
Фазил Асланов
