3-декабрдиз, волонтёррин международный йикъан вилик, Ахцегьа РФ-дин “Яшайишдин активвал”, “Образование” милли проектрин сергьятра аваз жегьил натуралистрин станциядин дараматда “Алакьдай хъсанвал ая!” лишандик кваз волонтёрвилиз куьмекдай ресурсрин-мумкинвилерин центр ачухна. Мярекатда Ахцегь муниципалитетдин кьил О.Абдулкеримова, РД-дин жегьилрин крарин рекьяй министр К.Саидова, РД-дин Халкьдин Собранидин депутат М.Алиханова, “Гуьгьуьллувилин крарик кьил кутун гегьеншардай центр” ДРОО-дин руководителдин заместитель Р.Абдуллаева, кьиле райондин жегьилрин парламентдин председатель Р.Шакиров авай жегьилрин дестеди ва гзаф масабуру иштиракна.
Мярекат райондин культурадин управленидин начальникдин заместитель Сулейман Сулейманова кьиле тухвана. РД-дин жегьилрин крарин рекьяй министерстводи им республикада кардик кутунвай кьуд лагьай центр я. Ихьтин дикъетдиз райондин жегьилар республикадин “Хъсан крарин регион” конкурсда гъалибвал къачуналди лайихлу хьана.
Лишанлу лент атIайдалай кьулухъ иштиракчийри жегьилрин мергьяматлу крарин центрадин залда чкаяр кьуна. Сифте гаф “Ахцегь район” МР-дин кьил Осман Абдулкеримоваз гана:
— Эхиримжи йисара район гьар са патахъай хъсанвилихъ дегиш жезва. Чна жегьилриз райондин общественный крара активнидаказ иштиракдай, чпин алакьунар ачухардай мумкинвилер гузва. И центр-кIвал абурун мурадрикни мумкинвилерик рум кутадай кьетIен чка я. Райондин жегьилрин месэлайриз дикъет гуналди, ина махсус центр ачухунай жегьилрин крарин рекьяй министр Камил Ра-мазанов, РД-дин Халкьдин Собранидин депутат Мегьамед Алиханов пара кьадар сагърай! Гила чи жегьилриз республикадин ва уьлкведин майданра Ахцегь райондин тIвар, таъсиб лайихлудаказ хуьдай мумкинвилер ачух хьуник умуд ква. Чна чи патай абуруз алакьдай вири жуьредин куьмекар гуда…, — лагьана, райондин регьберди Камил Саидовав ва Мегьамед Алихановав республикада жегьилрин волонтёрвал вилик тухунай ва Ахцегь райондин жегьилриз куьмекар гунай муниципалитетдин патай чухсагъулдин чарар вахкана.
— Къе сифте яз Ахцегьиз атана, ина жегьилрин кIвал-центр ачухдай мумкинвал хьунал зун пара шад я. Икьван чIавалди чун “онлайн” къайдада алакъада авай. Дагъустанда волонтёрство кардик квай 2010-йисалай чи тешкилатар вири муниципалитетра, вузрани сузра, гьатта бязи школайрани ава: тIугъвалдин четин шартIара волонтёрвал, кIевевайбуруз хушуналди куьмекун (им дагъвийрин ивидик квай къилих я) адетдин кардиз элкъвенва. Амма Ахцегьа ачухнавай центр кьетIенди я. Чкадин жегьилрин ихтиярда гегьенш къулай кIвал тунай, герек тир вири куьмекар хиве кьунай райондин кьиле авайбур сагърай. Жегьилрин мумкинвилер ачухарун, игьтияж авайбурун гъил кьадай программаяр уьмуьрдиз кечирмишун патал гуьгьуьллувал артмишдай ресурсрин центр герек оргтехникадалди тадаракламишиз, жегьилриз гьар жуьре форумра иштиракиз чна куьмекда. Гьелбетда, жуван вахт ва такьатар серфна, гуьгьуьллувилелди масадан куьмекдиз къвез нелай хьайитIани алакьдач. И кар патал тербиялу, регьимлу михьи рикI авай халис ватанперес хьана кIанда. Аллагьдиз шукур, ахьтинбур чахъ пара ава. Чи волонтёррин мергьяматлувилин гьар йикъан кIвалах активламишун патал чи жергейриз жезмай кьван гьахьтин жегьилар желбун важиблу я, — къейдна гуьгъуьнлай рахай Камил Саидова.
Ахпа ада РД-дин жегьилрин крарин министерстводин патай райондин активный са жерге жегьилрив — М.Селимхановав, Гь.Гьамзабеговав, М.Менафовав, А.Насировав, Ф.Башировав, Р. Шакировав, Н.Юзбеговав, С.Муртузалиевав чухсагъулдин чарар вахкана.
Мярекатдал Мегьамед алиханова къейд авурвал, Ахцегьа жегьилрин, волонтёррин мумкинвилерин центр ачухуналди, райондин ва республикадин руководстводи чи жегьилривай мергьяматлувилин, чирвилер къачунин, пеше хкягъунин ва нетижада район экономикадинни культурадин жигьетдай вилик тухунин месэлайра агалкьунар гуьзетзава. И рекье куь сифте кьил кутунриз, гьелбетда, чна къуват гуда. Къведай йис республикадин регьбер Сергей Меликова образованидинди яз малумарнава. И жигьетдай и центр вахтунда кардик кутунвай хъсан майдан я.
— Ахцегьрин жегьилрин центр гила чи уьлкведин 85 субъектдин волонтёррин сад тир къурулушдик акатда. Чна квез, гьуьрметлу жегьил волонтёрар (республикада 100 агъзурдалай гзаф волонтёрар ава), общественный крарин гьар жуьре рекьерай чирвилер къачуз куьмекда. Чна волонтёрвилин, яни обществодиз ва игьтияж авайбуруз экологиядин, культурадин, яшайишдин, медицинадин, образованидин, хатасузвал хуьнин ва маса хилерай чирвилерни тежриба гузва ва кIвалахда куьмекзава. Анжах виликамаз чун арза гуналди хабардарна кIанда. Рекьерин вири харжияр чна чал къачузва, — хабар гана “Гуьгьуьллувилин крарик кьил кутун гегьеншардай центр” ДРОО-дин руководителдин заместитель Рашид Абдуллаева.
Мярекат, чай ва ширинлухар алай суфрадихъ ацукьна, райондин жегьилринни муниципалитетдин кьилин ва атанвай багьа мугьманрин арада суал-жавабдин тегьерда давам хьана. ИкI, райондин жегьилрин крарин рекьяй пешекар Айвар Насирован суалдиз жаваб яз, К.Саидова лагьайвал, алукьзавай 2022-йисуз Ахцегь районда республикадин жегьилрин махсус форум тешкилда.
Дашдемир Шерифалиев
