Духтуррин меслятдалди, COVID-19 азардиз акси раб ягъайдалай кьулухъ зур йис алатайла, адан таъсир зайиф ва антителайрин кьадарни тIимил жезвайди, идахъ галаз алакъалу яз гьар са касди раб яна зур йис алатайла, ам мад сеферда хъиягъун лазим тирдал амал авуналди, СтIал Сулейманан райондин кьил Нариман Абдулмуталибова COVID-19 азардиз акси раб алатай гьафтеда мад сеферда хъияна. Идакай райондин пресс-къуллугъди хабар гузва.
Райондин центральный больницадин азарриз акси рапар ядай пунктуна духтур-терапевтди Н.Абдулмуталибован сагъламвилин гьал — сатурация (ивидик кислороддин кьадар), дамарра ивидин гьерекат ва бедендал ифин алани-алачни ахтармишна. Кьвед лагьай сеферда ягъун патал райондин регьберди “Спутник-Лайт” хкяна.
Коронавирус себеб яз арадал атанвай гьалар пайгардик ахкатун патал гьар са касди азардиз акси раб ягъунихъ авай менфятлувал къейд авунихъ галаз алакъалу яз мадни алава хъувуна: “Коронавирусдиз талукь яз гьалар гьа виликдай хьтинбур яз ама, хъсан хьанвач. Чун гьар сад жуван сагъламвал хуьниз мажбур я. Чна гьар сада жуван хизандин, багърийрин ва кIвалахдин рекьяй юлдашрин вилик жавабдарвал гьиссна кIанда. Чун чIехи яшара авай чи ватандашрин ва акьалтзавай несилдин къайгъудани хьун лазим я. Гзафбур, гьайиф хьи, азардиз акси рапар ягъунив жавабдарсузвилелди эгечIзава, абуруз тапаррихъ агъун хъсан аквазва. Им лагьайтIа, еке ягъалмишвал я, гьикI хьи, анжах азардиз акси рапар ягъунивай коронавирусдин вилик пад кьаз, вакцинадихъ ихтибарлувал ийиз жеда. Ам ягъайдалай кьулухъ чIуру са таъсирни чаз ганвач. Россиядин вакцинаяр агалкьунралди вири ахтармишунрай акъатна ва исятда дуьньядин гзаф уьлквейра абурукай менфят къачузва. За райондин агьалийриз азардиз акси раб ягъуниз эвер гузва. Эгер раб яна зур йис алатнаватIа, ам мад сеферда хъиягъун лазим я. Гьикьван чна гьар са касди и кар фад кьилиз акъудайтIа, гьакьван фад чалай азардал гъалибвал къазанмишиз ва тамам уьмуьрдив эхгечI хъийиз жеда”.
РикIел хкин: алай йисан февралдиз Нариман Абдулмуталибова, сифтегьанбурун жергеда аваз, коронавирусдиз акси раб янай. А чIавуз ада кьве компонентдикай ибарат тир “Спутник-V” хкянай.
Районда коронавирусдиз акси рапар ягъунив алай йисан январдин эхирра эгечIнай. Алай вахтунда райондин 8190 агьалиди рапар янава, абурукай 120-далай гзафбуру — кьвед лагьай сеферда. Сад лагьай ва гьакIни кьвед лагьай сеферра рапар янавай виридан гьалар хъсанзава.
«Лезги газет»
