Дагъустандин здравоохраненидин министерстводи COVID-19 азар фад ахтармишун патал маса къачунвай 100 агъзур экспресс-тест республикадиз агакьнава, абур медицинадин идарайрин арада пайнава…
Экспресс-тестрин куьмекдалди гила инсандин бедендик тIугъвал квани-квачни чирун патал 10-15 декьикьа лазим къведа. Ида, гьелбетда, духтурриз екез куьмекда — неинки азарлу хьанвай, гьакIни азарлудахъ галаз алакъа хьайи вири ксарин гьакъиндайни тади серенжемар кьабулдай мумкинвал гуда.
QR-код — са йисуз къуватда
Россиядин регионрин, гьа гьисабдай яз Дагъустандинни, COVID-19 азардикди начагъ хьайи агьалийрин QR- код гила са йисан вахтунда къуватда амукьда. Идакай Президент В.Путина Гьукуматдин членрихъ галаз кьиле тухвай совещанидал вице-премьер Татьяна Голиковади хабар гана…
Президентди ихьтин къарардин тереф хвена, гьикI хьи, COVID-19 азардикди садра азарлу хьайибур мад сеферда азарлу хъжезвай дуьшуьшри 0,74 % тешкилзава.
“Иммунизациядин хиле зегьмет чIугвазвай алимрихъ, экспертрихъ галаз санал чи уьлкведин ва международный ахтармишунрин нетижаяр чирайдалай кьулухъ чун ихьтин къарардал атана: COVID-19 азардикди начагъ хьайибурун сертификат са йисан вахтунда къуватда амукьун лазим я. Исятда ам зур йисуз къуватда ава”,- лагьана Т.Голиковади.
Вице-премьерди къейд авурвал, COVID-19 азардиз акси раб янавайбуру, зур йис алатайла, ам мад сеферда хъиягъун (ревакцинация) герек я. ГьикI хьи, и вахт алатайла, инсандин беденда, раб ягъайла, арадал къвезвай антителайрин кьадар тIимил жезва.
Дагъустандин здравоохраненидин министерстводин пресс-къуллугъди хабар гузвайвал, республикада азардиз акси рапар язавайбурун кьадар яваш-яваш артух жезва. ИкI, ноябрдин эхирдиз авай делилралди, COVID-19 азардиз акси рапар 652 405 агьалиди янава. Ида рапар ягъунин лазим тир кьадардин 41% тешкилзава.
Чи мухбир
