Чи баркаллу мад са ватанэгьлидикай чир хьайила, рикI шадвилив ацIанвай за муштулухдин хабар вирибурув агакьариз гьерекатна. Жабиев  Азим  Абдуризакьович  — медицинадин къуллугъдин подполковник, фронтовик, медицинадин илимрин кандидат, РСФСР-дин лайихлу духтур, Яру гъед, Ватандин дя­ведин 1-дережадин орденрин, са жерге медалрин, гьакI Ленинан кьве ордендин сагьиб тир маса кас-духтур чаз чидач.

Ам 1913-йисан 25-декабрдиз Самур округдин Хкемрин хуьре (Ахцегь район) машгьур малдар Абдуризакьан зегьметчи чIехи хизанда дидедиз хьана. 1929-йисуз, Ахцегьрин машгьур мектебдин 9-класс куьтягьна, зигьинлу, дирибаш гада кIвалахиз физвай хуьруьнвийрихъ галаз Бакудиз акъатна. Ана кIвалахни ийиз, кIелун давамариз алакьай жегьил, гьикI ятIани, Урусатдиз акъатзава ва 1932-йисуз Саратов шегьердин медицинадин 2-институтдик экечIна, 1937-йисуз анаг яру дипломдалди акьалтIарзава.

1938-1939-йисара Азим Абдуризакьович (адаз Алиевич лугьудай) Москвадин меддесантдин дестедик кваз венерический азаррин вилик пад кьун патал Монголиядиз (а макъамда ана куьчери малдаррин 80% сифилисди кьунвай) рекье твазва.

Ватандин ЧIехи дяве башламишайла, А.Жабиева, духтур яз, Дальний Востокда армияда къуллугъзавай. Ахпа фронтда, чуьл­дин госпиталрин духтур, Сталинграддин фронтдин госпиталдин кьилин духтур яз, низ чида ада гьикьван аскерар къутармишна, кIвачел ахкьал­дар­натIа. Духтурди тухузвай хсуси днев­никдай малум жезвайвал, са юкъуз­ пакаман сятдин пудаз азарлуйрин палатадиз, залан хер алай вичин са командирдал кьил чIугваз, генерал Василий Чуйков акъатна. Гьа чIавуз дневникда къейднавайвал, Азим духтурди женгера гьар жуьредин хирер хьанвай 1800 аскер операция авунвай. Дяве ада 1946-йисуз подполковникдин чинда аваз куьтягьна, отставкадиз экъечIна.

1948-1949-йисара Азим Абдуризакьовичал Къиргъизистан ССР-дин здравоохраненидин министрдин заместителвилин, ахпа 8 йисуз Москвада РСФСР-дин здравоохраненидин министерствода жавабдар къуллугъар­ ихтибарзава. 1958-йисуз ам Серноводск курортдин кьилин духтурвиле тайинарзава. Ахпа, 1960-1980-йисара, Москвада здравоохраненидин министерстводин къурулушда агалкьунралди кIвалахзава. Тамам 17 йисуз — машгьур Ленинские горки лугьузвай чкада “Дуствал” клиникадин кьилин духтурвиле, СССР-дин ва къецепатан уьлквейрин регьберрин сагъламвал мягькемарзавай а клиникада дуьшуьшдай вичин виликан таниш Маршал В.А.Чуйковахъ галаз гуьруьшмиш хъхьайла, Маршалди адаз вичин госдачадиз теклифна, къунагъламишнай.

Лайихлу пенсиядиз экъечIайдалай кьулухъ Азим Абдуризакьовича, 1939-йисалай Москва шегьерда пропискада хьайи баркаллу­ дагъвиди, меркездин патав гвай райбольницадин кьилин духтурвал ийиз, ана чкадин жемятдин патай кьетIен гьуьрмет къазанмишна.

А.А.Жабиев 1992-йисан 5-январдиз рагьметдиз фена, Москвадин сурара кучукнава. Уьмуьрдин юлдаш Маргарита Михайловнадихъ (1930-2010) галаз абуру хушбахт, яргъи уьмуьр кечирмишна, лайихлу веледар ва хтулар тербияламишна. Руш — Жабиева Аида Азимовна бубадин рекьяй фена, медицинадин илимрин докторвилин дережадив агакьна, яргъал йисара Москвада — Россияда онкологиядин рекьяй виридалайни чIехи центрада (РОНЦ РАМН им Н.Н. Блохина на Каширке) — кьилин духтурвиле (2018-йисуз кечмиш хьана) кIвалахна, хва Артур Азимовича (1956-йис) Москвада Бауманан тIвару­нихъ галай техуниверситет акьалтIарна, къе чIехи къуллугъдал алаз, зегьмет чIугвазва.

Дашдемир Шерифалиев