ЦIийи ктаб!
И мукьвара “Мавел” чапханада чи бицIекар патал лап хъсан савкьат жедай цIийи ктаб акъатнава. И гъвечIи ктабдин тIвар “Пси-пси псайди”, автор Пакизат Фатуллаева, гуьрчег шикилралди ктаб чIагурайди москвави художник Марина Самарченко я.
3-6 йиса авай аялдиз дидедивай, бубадивай, бадедивай, метIел ацукьарна, кIелиз, адахъ галаз жуван дидед чIалалди кIелайдакай ихтилатар ийиз, ана авай шикилра тIуб экъуьриз жедай ктабар чахъ икьван йисара саки хьанач лагьайтIа, чун ягъалмиш жедач. Чи са шумуд несил урус чIалалди кхьенвай, гуьрчег шикилралди чIагурнавай, аялрин яшдиз кутугай махар, шиирар, гьикаяяр кIелиз чIехи хьанва. Абурни чи гъилера хара-хара хьана. Нивай жузуртIани, К.Чуковскийдин, С.Маршакан, С.Михалкован, А.Бартодин са эсер кьванни хуралай течизмай инсан, белки, чал гьалтдач! Бес чи дидед чIалал вуч рикIел алама? ГъвечIи чIавуз рикI алаз кIелай гьи ктабдин тIвар кьаз жеда чавай?
Эхиримжи йисара чун, лезгияр, чIал гъиляй физва лугьуз, гьарай-эвердик ква. Дуьньядин пешекар алимри гьисабзавайвал, аялрин бахчаяр милли чIалар хуьдай мукар я. Гьахълу гафар я: лап гъвечIи яшда аваз, инсандин бейнида гьатай гаф уьмуьр амай кьван адан рикIел аламукьда. КIанзавайди аялдин гъиле рикI ацукьдай, адавай иливариз жедай чIалал кхьенвай ктабар вугун я.
И жигьетдай къе чи вилик квай ктаб инал лагьанвай хьтин вири метлебриз жаваб гузвайди хьанва. Чаз хабар хьайивал, П.Фатуллаевадин гъилик мад са проект — 7-11 йисара авай аялар патал гуьрчег шикилралди чIагурнавай, лезги халкьдин махарин ктаб ква. Художник кIвалахдив эгечIнава.
“Пси-пси псайди” ктаб “Лезги газетдин” редакциядай, “Мавел” чапханадай маса гузва. Генани суракьда авайбурувай телефондин и нумрадиз зенг ийиз жеда: 8-963-792-23-70. Ктабдин къимет 300 манат я.
«Лезги газет»
