Алатай вацран эхиримжи кьве юкъуз Мегьарамдхуьруьн районда, ДАССР-дин 100 йисан юбилейдин сергьятра аваз, аскер-интернационалист, Советрин Союздин Игит Абас Исламович Исрафилован экуь къамат рикIел хуьнин лишан яз, жаванрин арада азаддаказ кьуршахар кьунай республикадин дережадин турнир кьиле фена. Идакай райондин пресс-къуллугъди хабар гана.  Турнир ачухуниз талукьар­навай мярекатдал райондин кьил Фарид Агьмедова, РД-дин физический культурадин ва спортдин министерстводин физкультурадинни спортдин ва резервдин управленидин начальник Халитбег Махачева, райондин администрациядин жавабдар къуллугъчийри, идарайрин  регьберри, спортсменри ва бягьсериз тамашиз атанвай ксари иштиракна.

Фарид Агьмедова районда кьиле тухузвай спортдин серенжемда иштиракун патал атанвай спортсменрин ва мугьманрин тIварарихъ, гьакI Дагъустандин физический культурадин ва спортдин министерстводиз турнир тешкилунин карда куьмек гунай разивилин келимаяр лагьана.

— Чун районда кьиле тухузвай кIва­лах­да спортдиз датIана жезмай кьван гзаф фикир, бажарагъ авай спортсменриз куьмекар гуз чалишмиш жезва. Абуру лагьайтIа, чпин гъвечIи ватан машгьурзава ва чпин чешнедалди амайбурни спортдал машгъул хьунал желбзава, — лагьана ада.

Спортсменрихъ элкъвена, Фарид Агьмедова спортда мадни еке кукIушар муьтIуьгъардай къуватар хьун алхишна, спортдал машгъул хьунихъ авай хийирдикай лагьана. Спорт неинки беден, гьакIни руьгь лигимарзавай къуват тирдал фикир желбна.

— Къе акъажунар кьиле тухузвай спортдин комплекс чи  машгьур ватандаш, Совет­рин Союздин Игит Абас Исрафилован тIва­рунихъ гала. Адан экуь къамат рикIел хуьнин лишан яз ва районда спорт вилик тухун патал кьиле тухузвай и турнирдихъ мадни еке макьсад ава — акьалтзавай несил ватанпересвилин руьгьдаллаз  тербияламишун, — къейдна райондин кьили.

Спортдин серенжемдин сергьятра аваз Ф. Агьмедова Мегьарамдхуьруьн районда физический культура ва спорт вилик тухуник еке пай кутунай РД-дин физический культурадин ва спортдин министерстводин физкультурадинни спортдин ва резервдин управленидин начальник Халитбег Махачевав чухсагъулдин Чар вахкана.

Кьве юкъуз давам хьайи турнирда чи республикадин 17 муниципалитетдай тир 21 командади (200-дав агакьна спортсменри) чпин устадвал къалурна. ИкI, Мегьарамдхуьруьн райондин команда 1-чкадиз лайих­лу хьана. 2 ва 3-чкаяр, талукь тирвал, Белиждин ва Дербентдин командайри кьуна.

Чи мухбир