Наразивал малумарна

Великобританиядин парламентдин векил Стивен Киннока къейднава хьи, Россияда кьиле фидай 2018-йисан футболдин чемпионат са йисан геж маса уьлкведа кьиле фин лазим я. Идан гьакъиндай чиновникди BBC Radio-дин эфирда лагьана.

“За фикирзавайвал, чна футболдин международный федерациядиз  чемпионат 2019-йисал вегьин хъувун патал чи фикир малумарна кlанда”, — къейднава Киннока.

Парламентдин векилди, ГРУ-дин виликан полковник Сергей Скрипаль зегьерламишунин кар фикирда кьуна, ихьтин теклиф малумарнава. Къейд ийин, 14-мартдиз Великобританиядин премьер-министр Тереза Мэя жасус ва адан руш Юлия рекьиз кlан хьунай тахсир Москвадик кутунай. Ихьтин нетижадал атунин себебни ам я хьи, адан фикирдалди, Садхьанвай Пачагьлугъда чуьнуьх жедай чка жагъай Россиядин военный разведкадин виликан офицер РФ-да арадал гъанвай затlунал­ди зегьерламишнава.

Россиядин гьукуматди ихьтин тахсир кутун бинесузди, гьахъсузди я лагьанва.

Мэя Россиядин 23 дипломат чпин уьлкведай­ ахкъудунин ва Россиядихъ галаз авай кьве патан­ алакъаярни акъвазарунин гьакъиндай малумарнай. Идалайни гъейри, Британиядин гьукуматди  футболдин чемпионатдиз Россиядиз фидай дестедин дережа тlимилар хъувун кьетlнава.

Некlедин продуктар ахтармишда

Россиядин туьквенра 26-мартдалди некlе­дин продуктар гегьеншдаказ ахтармишунин гьерекат кьиле фида. Абурун къалпвал дуьздал акъудунин мураддалди и жуьредин ахтармишунин кlва­лах федеральный дережада сад лагьай сеферда яз тухузва.

Вице-премьер Аркадий Дворковичан тапшуругъдалди ахтармишунин кlвалах Россельхознадзорди, Роспотребнадзорди ва Роскачестводи кьилиз акъудда. Къейдзавайвал, ахтармишунар продукт гьасилзавайбуруз талукь жедач. Ахтармишун патал некlедин, дуьдгъвердин ва шурадин чешнеяр кура-кура къачуда.  Ахтармишунин кlвалахдал “ачух гьукуматдин” месэлайрин рекьяй министр Михаил Абызова гуьзчивалда; синагъдай акъудунин программа тестикьарун ва арадал атай нетижаяр гуьзчивал тухунин цlийи къайдайрин сергьятра аваз веревирд авун адал тапшурмишнава.

А.Дворковича къейднава хьи, Россияда вичин нек без жезвач, гьавиляй малдарвал яваш-яваш сифте чкадал акъудда. 26-февралдиз Россельхозди Белоруссиядин некlедин продуктрал къадагъа эцигунин гьакъиндай малумарнай. Гуьгъуьнлай къадагъа авунин югъ 6-мартдал, ахпа 15-мартдал хутахнай. Къадагъа авунин себеб вуч я лагьайтlа, продукт хатасузвал авачирди яз гьисабнавай.

Хаталу я

Европадин махсус комиссияди спиннерар сагъламвал патал хаталубур яз гьисабзавай метягьрин сиягьдик кутунва. Аялар къугъвадай спиннер и ва я маса хаталувал кваз хьун мумкин тир затlарик акатнава. И къайдади Еросоюздин уьлквейриз ихьтин метягьрин гьакъиндай сада-садаз вахтунда хабар гунин мумкинвал гуда, идалайни гъейри, абур маса гузвай чкайрай вахчуз жеда. Эгер са гьи уьлкведа ятlани  хаталуди яз гьисабзаватlа, идан гьакъиндай муькуь уьлквейрин арадани малуматар раижда. Ихтилат физвай къугъвадай шей къадагъадин сиягьдик хьун адак аялди туькьуьнун мумкин тир куьлуь затlар хьунихъ галаз алакъалу я. Лугьуз­вай­вал, иллаки электричестводин эквер авай спиннерра ишлемишзавай гъвечlи батарейкаяр хаталу я. Къенез фейитlа, абуру ратар куда. Къадагъадин сиягьда аялрин бязи машинар ва мотоциклиярни гьатнава.

Къейд ийин,  спиннер 2017-йисан гатфариз гзаф машгьур хьана. Шазан майдин вацра жуьреба-жуьре спиннерар Америкадин зурба “Amazon” интернет-туьквендин сифте жергейра авай.

Гьазурайди — Куругъли Ферзалиев