28-ноябрдиз Докъузпара райондин кьил Мегьамед Шамилова Къалажух хуьре футбол къугъвадай гъвечIи майдан туькIуьрдайвал, махсус жуьреда чил дуьзарна, спортдин махсус тадарак эцигзавай чкадал фена, эцигунрин кIвалахар кьиле физвай гьал ахтармишна.
Идакай Докъузпара райондин информациядин центради хабар гузва. Хуьруьн администрациядин кьил Замидин Мирзоевахъ галаз санал райондин кьиле авай ксар эцигунардайбурухъ галаз гуьруьшмиш хьана. КIвалахар ина эхирдив агакьзава. Амайди чиргъ вегьин, кьеж кIватIдай ва къерехдихъ акъуддай система туькIуьрун я. Идалайни гъейри, и чкадив агакьардай рехъни ремонт авуна кIанзава.
Футбол къугъвадай майдан Дагъустан Республикадин государстводин “РД-дин хуьрерин чкаяр еримлу авун” программадин сергьятра аваз туькIуьрзава. Заказчик “Дагсельхозстрой” ГКУ я, пудратдин кIвалахар “Спортдин академия” ООО-ди тамамарзава.
Гуьгъуьнлай райондин кьили Къалажух хуьруьн парк туь-кIуьрнавай чка ахтармишна. Ина кIвалахар тамамарна акьалтIарнава. Хуьре парк “Зи Дагъустан — шегьердин къулай шартIар” проектдин сергьятра аваз туькIуьрнава.
РикIел хкин, алай йисуз пудратдин “Норматорг” ООО тендерда гъалиб хьана. Жемиятдин объект эцигун патал авунвай кIвалахрин икьрарда къалурнавай къимет 1 миллионни 799 агъзурни 822 манат я. Паркдин майдан 1500 кв.метрдиз барабар я.
Идалайни гъейри, алай вахтунда хуьруьн юкьван куьче ремонтзава. Гьавадин шартIар ва куьчейрин гуьтIуьвал себеб яз, залан техникадиз са кьадар четин хьанва. КIвалахар республикадин “Зи Дагъустан — зи рекьер” программадин сергьятра аваз кьиле тухузва.
Чи мухбир
