Кьилин редактордин гаф
27-ноябрдиз Махачкъалада кьиле фейи “Лезги газетдин” 100 йисан юбилейдин мярекатдихъ редакциядин коллектив патал еке метлеб ава. “Лезги газет” — им чна кIвалахзавай адетдин са идара туш. Ам чи вири халкьдин дамах я! Кхьизвай гьар са макъаладив, газетдин гьар са чинив, гъиле кьазвай гьар са проектдив чун рикI гваз эгечIзава. Вучиз лагьайтIа, чаз чи кIвалах гзаф кIанзава ва чна чи хиве гьихьтин жавабдарвал аватIа, гьиссзава.
Юбилейдин мярекатдихъ вири лезгияр, дагъустанвияр патални чIехи метлеб ава. Ам халкьдин умуми сувар я! ИкI тирди межлисдин иштиракчийри, чаз къени кваз жуьреба-жуьре уьлквейрай, шегьеррай къвезвай зенгери, кхьизвай телери тестикьарзава.
Авайвал лагьайтIа, чахъ юбилейдин мярекат маса къайдада, яни мадни гегьеншдиз тухудай ниятар авай, амма коронавирусдин тIегъуьнди ахьтин мумкинвал ганач. Санлай къачурла, зи фикирдалди, мярекат хъсандиз кьиле фена. ИкI неинки са за, гьакIни юбилейдилай гуьгъуьниз заз зенгер авур цIудралди иштиракчийрини фикирзава.
За мярекатда иштиракай ва аниз къведай фикир аваз, амма мумкинвал тахьай вири ватанэгьлийриз — гьукумдин, жемиятдин векилриз, алимриз, шаирриз — виридаз редакциядин коллективдин тIварунихъай рикIин сидкьидай сагърай лугьузва.
Мярекатда Докъузпара райондин кьил Мегьамед Шамиловалай гъейри, амай районрин кьилеривай, гьайиф хьи, иштиракиз хьанач. Абурукай бязибуру чпивай къвез тежедайдакай заз виликамаз хабар ганвай ва юбилейдиз администрациядин векилар рекье тунвай. “Лезги газетдин” юбилейдин межлисдик вири районрин кьилери, Дагъустандин Халкьдин Собранидин вири депутатри, чпел “халкьдин” тIвар алай шаирри, писателри, артистри иштиракнайтIа мадни хъсан жедай. 100 йисан юбилей тир эхир!
Юбилейдин мярекатдал гаф гуз кIанзавай юлдашар мадни авай. Амма бязи шартIар себеб яз, кьилди къачуртIа, межлис тухун патал чара авунвай вахт куьтягь жезвайвиляй а кар кьилиз акъудиз хьанач.
Чавай гьакIни анал редакциядиз чкайрилай кхьизвай штатдик квачир мухбиррин лайихлувилерни къейд ийиз хьанач. Абур лагьайтIа, садни кьвед ваъ, саки 100 касдив агакьна ава: Кьиблепатан Дагъустандин районрилай эгечIна, республикадин са жерге шегьеррал, Хасавюрт райондал къведалди. Декабрдин вацра, Аллагьди гайитIа, чун районриз мугьман жеда ва газетдихъ галаз алакъа хуьзвай мухбиррихъ галаз гуьруьшар кьиле тухуда, абурув грамотаяр, бязибурув юбилейдин медалар вахкуда.
Юбилей къейдзавай йисуз ФЛНКА-дин президент Ариф Керимовани адан хва, “Национальное возрождение” фондунин президент Токай Керимова хайи чIалал акъатзавай газетдин редакция патал вижевай савкьат авуна: чун авай мертебадин дегьлиз цIийикIа туькIуьр хъувун патал 900 агъзур манат пул серфна. И такьатрихъ чна редакция авай гьавада ремонтдин кIвалахар кьиле тухвана акьалтIарнава. Заз абуруз мад сеферда сагърай лугьузва.
Редакциядихъ галаз фадлай алакъаяр хуьзвай архитIви Альберт Эмиргъаева лагьайтIа, “Лезги газетдин” музей арадал гъунин карда пулдин куьмек гун фикирда кьунва. Къуй вичин мумкинвилерни берекатар мадни пара хьурай!
Юбилейдин мярекатдин сергьятра аваз чна редакциядиз чпелай алакьдай куьмекар гузвай са жерге юлдашрив “Лезги газетдин — 100 йис” медалар вахкана. Абурукай и нумрадин 8-чина гегьеншдиз раханва. Медалриз лайихлу хьанвайбурун арада мадни ФЛНКА-дин президент Ариф Керимов, РД-дин Халкьдин Собранидин депутатар тир Имам Яралиевни Мурадхан Хидиров, “Просвещение” фондунин президент Магьмуд Абдулкеримов, СтIал Сулейманан райондин кьил Нариман Абдулмуталибов, “Димитров Кабель” ООО-дин регьбер Шагьпаз Асаханов, жемиятдин машгьур деятель Мамед Абасов, Каспийск шегьердин администрациядин депутатрин собранидин председатель Абдулвагьид Жаватов, медалдин автор Гьасангьуьсен Абдулжелилов ва са жерге масабур ава. Абурув шабагьар идалай кьулухъ кьиле фидай мярекатрал, гуьруьшрал вахкуда.
Юбилейдин мярекатдиз къвез тахьана, гуьгъуьнлай редакциядиз тебрикдин телер ракъурнавайбурун арада Дагъустандин тамарин майишатдин Комитет, Дагъустандин гуманитарный колледж, РД-дин Санкт-Петербург шегьерда авай Векилхана, гьа и шегьерда кардик квай лезги тешкилатдин членар, Дербент шегьерда кардик квай дуьньядин медениятдин ва динрин тарихдин музей ва маса карханаяр, кьилдин ксар ава.
Заз мад сеферда абуруз ва гьакIни газетдин юбилейдин мярекатдиз Дагъустандилай къецепатай хтай стхайриз (Москвадай, Ярославлдай, Ставрополдай, Харьковдай) сагърай лугьуз кIанзава. Чун вири чIехи са хизан я!
Мегьамед Ибрагьимов
