Хъсан патахъ дегиш жеда
Алай йисуз Дербентда уьмуьрдиз кечирмишзавай капремонтдин программадин бинедаллаз шегьерда яшамиш жезвай 2500 агьалидин яшайишдин шартlар тамамдиз хъсан патахъди дегиш жеда.
Гзаф квартираяр авай 18 кlвал капремонт ийизва. И йикъара ихьтин 10 кlвале ремонтдин кlвалахар акьалтlарнава. Абурун къавар дегишарнава, подвалар, кlвалерин вилик патан цлар ва инженервилин системаяр ремонтнава. Йисан эхирдалди амай кlвалерани ремонтдин кlвалахар акьалтlардайвал я.
Ремонтнавай гьар са кlвал еридиз къимет гузвай комиссияди кьабулзава.
Цlийи кьилелай туьхкlуьрна
Малум тирвал, Дербентда рекьериз, куьчейриз талукь программадин сергьятра аваз са шумуд куьче цlийи кьилелай туькlуьр хъувунин кlвалахар худда кьиле физва.
Граф Воронцован тlварунихъ галай, 1196 метр алай куьчедани туькlуьр хъувунин кlвалахар и йикъара акьалтlардайвал я. Икl, и куьчеда хъвадай цин, марфадин ва чиркин ятар фидай турбаяр дегишарнава, токдин симерин цIийи шалманар акlурнава ва куьчеда къир цанва.
И кlвалахрал гуьзчивал тухузвай шегьердин эцигунардай управленидин отделдин кьилин пешекар Атлухан Самурханован гафаралди, вири кlвалахар проектдинни сметадин документра къалурнавайвал кьиле тухванва. Гила куьчеда лишанар ва рекьин ишараяр эцигдай кlвалахар ама. Вацран эхирдалди гьабурни акьалтlарда.
Къир цазва
“Дербент шегьердин мулкар вири патарихъай еримлу авун” программадин сергьятра аваз вад куьчеда (Г.Веядин, М.Казимбекован, Д.Ашурован, Гранатовая ва Октябрдин 25 йисан) къир цанва.
Шегьердин администрациядин ЖКХ-дин управленидин производстводинни технический гуьзчивилин начальник Этибар Исмаилован гафаралди, виликдай и куьчеяр къекъведай гьалда авачир. Цазвай къир хсуси кlвалерин варарилайни гьаятрилай хкаж тахьун патал, куьчейрай накьв акъудна, дуьзарна.
Адан гафарай малум хьайивал, и куьчейрин тротуарар аваданламишунин проектдинни сметадин документацияни гьазурнава. Планда къалурнавайвал, 9900 кв.м. тротуарра къван твада. Идалайни гъейри, токдин симер, симерин шалманарни дегишарда.
Къагьриман Ибрагьимов
